AGM PKR diatur di Bintulu kena 25 Ogos tu
BINTULU: Aum Besai Ninting Taun (AGM) Parti Keadilan Rakyat (PKR) ba Bintulu kena 25 Ogos tu disadang deka digulu lebih ari 1,000 kaban parti.
Pemangku Ketuai PKR Pampang Bintulu, Peter Jap, ngelalau semua kaban parti ngawakka diri maya haribulan nya lalu datai baum ba Hotel Li Hua Bintulu.
Ku iya, naka diatu, PKR Bintulu bisi urung 1,200 iku kaban ngerejista diri lalu penyampau nya majak nambah.
Nangkan nya, Jap mega nerang pengawa milih pengari ba nengeri enggau perintah besai mega deka diatur di Bintulu kena 6 Oktober.
“Pengawa bepilih dalam bulan Oktober, antara tuju iya dikena neguhka agi penuduk PKR dalam Pakatan Harapan (PH),” ku iya ba aum pengarang berita apin lama ke udah.
Ku Jap, atur pengawa bepi- lih deka ngena sistem e-undi laban sistem baru deka jampat enggau nemban, ke alai sti software khas deka dikena maya atur ngundi.
Berebak enggau nya, pengari ari PKR Bintulu, Kelvin Kilo Lutan mantaika penangi diri ba pemalat gaya jalai ti rusak kelebih agi ba kandang menua Kidurong lalu ngansak ejensi bekuasa bekaul jampat bejalaika pengawa nyeleti jalai nya ke pengelikun sida ti betengahka jalai.
Iya mega ngansak perintah nengeri ngamatka semaya ti digaga sida rambau pengawa bepilih besai nyin tadi kelebih agi bekaul enggau projek bekal ai enggau bekal kuasa karan di kandang menua pesisir.
“Perintah nengeri meseti beratika isu tu enggau serius kelebih agi bekal ai enggau kuasa karan di kandang menua Sepupok Suai enggau Sebauh,” ku iya nambah.
Penerang silik pasal AGM tau betelefon nuju Peter Jap (019-8892850) enggau Kelvin (019-3325538).