Sadia-Krian mujur numbuhka Program Sadia-Apan
KUCHING: Sadia- Krian mujur numbuhka Raban Pemeri Runding Ari Luar ti enggau tuju nulung ngemata sereta ngemansangka Program Penyaup Pengawa Sekula, ti diberi nama Program Sadia-Apan.
Nitihku Chairman SadiaKrian, Andrew Paul bisi tiga iku ke datai ari bidang pengawa sekula iya nya Professor Madya Dr. Jennifer Tunga Janang, Professor Madya Dr. Bromely Phillip enggau Danggat A. Chabo setuju nyadi penyanding penemu ngagai Program Sadia-Apan nya.
“Aku berasai gaga amat ati laban kitai mujur ngaga kaul entara orang bepengelandik mansik utai dalam bidang injiniring enggau pengelandik mansik utai dalam bidang akademik.
“Ngelama tu kitai ngasaika mensia mayuh apin meda empas pengawa mansik utai dalam bidang injiniring maya pengelandik nya dibai ngagai pengawa sekula.
“Diatu lebuh pengelandik nya dipegulaika enggau pengelandik mansik dalam bidang akademik, kitai ngasaika bisi bendar pengelebih,” ku Andrew ti siku injinir ti bepeneleba 15 taun ba pengawa mansik dalam bidang injiniring (R&D and Yield Enhancement).
Andrew meri penerang nya ngagai Utusan Borneo, lebuh ti ngenang pasal penumbuh Program SadiaApan, apin lama.
Nitihku Andrew, Program Sadia-Apan dipejalaika ngena chara worksyop dalam timpuh lima hari ungkup nembiak Form 1 ngagai Form 3.
Tang ku iya, ba bulan September taun tu, program ke sama mega deka dipejalaika ngena chara licha sehari ungkup nembiak Form 4 ke atas, ti deka diatur dulu ba Indu Opis Serakup Dayak Iban Sarawak (SADIA) di Batu 7.
“Kebuah timpuh program tu ke diatur bisi bida laban nembiak Pom 3 ke baruh agi begunaka mayuh macam aktiviti dikena nerangka reti utai enggau silik ngagai sida, tang nembiak Form 4 ke atas engka ulih dipadahka tauka diterang ngena chara licha,” ku Andrew.