Jalur Gemilang patut digitang ngena chara ke betul
MIRI: Jalur Gemilang nyadi kelai menua lalu patut digitang ngena chara betul ngambi enda ngamahka nama Malaysia.
Kaban Parlimen (MP) Miri, Dr Michael Teo madahka Jalur Gemilang patut digitang enggau basa dikena nerenakka asai talukka menua.
“Nadai salah enti rayat ngitang Jalur Gemilang ba tetiap rumah, kerita enggau begunan opis kelai talukka menua maya bulan menua merdeka,” ku iya lebuh bejadika Program Kibar Jalur Gemilang Peringkat Bahagian Miri 2018 ditu, ensanus.
Asai talukka menua ku iya patut diterenak ba tetiap ati peranak Malaysia kelebih agi rebak nembiak dikena meri peransang sereta pengawa ngemansangka menua.
“Rebak nembiak ti deka nampung pengawa enggau ngangkatka bansa Malaysia dudi hari, endang patut sida seruran diembing, diseridi enggau diajar enggau semengat talukka menua,” ku iya madah nyemetak.
Nya kebuah, Jalur Gemi- lang ti udah luya enggau udah lama digitang diteju pia aja, tang patut disilih ngena ke baru, ngayanka penaluk ngagai menua.
“Kitai mega ulih ngerichahka kimpin merdeka ngena media rama baka mantaika aktiviti bekaul enggau merdeka ba Facebook, Instagram, Twitter enggau ke bukai,” ku iya.
Teo mega nesau bala komuniti besaup gawa enggau perintah ngambi ngerichahka agi pengerami ngintu bulan meredeka.
Ba lansa bukai, rambai jaku ‘Sayangi Malaysiaku’ udah dipilih lalu engkeman amat dikena ngintu Hari Nasional taun tu.
Tu ngemai reti rayat menua tu datai ari pupu bansa diau dalam pemaik, sepenemu enggau beserakup sereta talukka menua.
Sama bisi datai Pemesai Pemadah Miri/Bintulu Aba Sam, Pemesai Khas Opis Menteri Kaunsil Kandang Menua enggau Pengawa Berumah ( KPKT), Voon Shiak Ni sereta bala pemesai perintah ke bukai.