Program ke diatur semanjai sebulan nyadi pelasar ti manah endur mandangka penyerakup pupu bansa di Malaysia
KAPIT: Kimpin ngibauka Jalur Gemilang iya nya siti program ti manah ke digaga dalam nyambut Bulan Merdeka dikena nerenakka runding talukka menua.
“Kimpin Jalur Gemilang siti ari aktiviti ti beguna dikena nentuka runding talukka menua dalam rayat Malaysia kelebih agi maya kitai ngintu Bulan Merdeka. Mensia mayuh diperansang ngambi nirika tambai Jalur Gemilang ba opis perintah, begunan kedai sereta perengka pengangkut dikena mandangka pengandal kitai ngagai menua tu ti udah ulih merintah kediri,” pia ku Pemesai Pelilih Kapit Elvis Didit lebuh iya bejadika ‘ Kempen Kibarkan Jalur Gemilang’ renggat pelilih Kapit ba Town Square ditu kemari.
Program tu ke diatur Opis Pemadah Pelilih Kapit be- gulai enggau Opis Pemadah Song enggau Belaga.
“Kimpin ngibauka Jalur Gemilang nyadi siti program ti manah ke diatur Opis Pemadah Pelilih Kapit. Tu nerima respon ti manah ari ketuai opis enggau ejensi perintah, peranak Kapit, ketuai komuniti sereta Gerempung Ukai Dikuasa Perintah (NGO). Pia mega kimpin tu nerima respon ti manah ari palan nyeridi anak mit ti udah ngemeranka penyerakup idup begulai,” ku Elvis.
Program tu ngembuan reti ti nyelai laban pemisi Jalur Gemilang tu iya nya kelai penumbuh menua tu ke ulih me- rintah kediri. Jalur Gemilang tu iya nya siti kelai penerakup peranak Malaysia.
“Kitai ngembuan mayuh pemaik ngintu Bulan Merdeka laban berindik ari Hari Merdeka kena 31 Ogos lalu Hari Malaysia kena 16 Sep- tember, lalu kededua hari bulan tu ngembuan reti ti besai ngagai kitai semua,” ku iya nambah.
Sama bisi meri jaku pengelalu maya pengerami nya Pemesai Opis Pemadah Pelilih Kapit Jusy Henry Anchangan.
Sama bisi datai ba pengerami nya Pemesai Opis Pemadah Belaga Luhat Lihan, ASP Fauxan Kasim, Pemesai Opis Pengintu Pengelantang enggau Rama Kapit Peter Gabong, Pemesai Opis Nembia, Lumba enggau Main Kapit Shyenmier Jean Sherit sereta Pemesai Opis Penyerakup Menua enggau Integrasyen Bansa Jendri Mangku.
Entara aktiviti ti bisi dipejalai maya nya aksesais aerobik, pekit baju ti digaga ari Jalur Gemilang, pemerindang lagu patriotik, pengawa melah kek sereta mayuh agi.
Kimpin Jalur Gemilang siti ari aktiviti ti beguna dikena nentuka runding talukka menua dalam rayat Malaysia kelebih agi maya kitai ngintu Bulan Merdeka. Mensia mayuh diperansang ngambi nirika tambai Jalur Gemilang ba opis perintah, begunan kedai sereta perengka pengangkut dikena mandangka pengandal kitai ngagai menua tu ti udah ulih merintah kediri. Elvis Didit Pemesai Pelilih Kapit