‘Learning Awareness & Study Smart’ dikena nyaup nembiak meretika pengawa sekula
KUCHING: ‘ Learning Awareness & Study Smart’ iya nya Program Sadia-Apan ke nyadi sebengkah Program Penyaup Pengawa sekula ti diatur Sadia-Krian enggau tuju nguji meri runding ngagai nembiak pasal kuing pengawa sekula.
Chairman Sadia-Krian Andrew Paul madahka ‘Learning Awareness & Study Smart’ ti dipejalaika kenyau ari taun 2016, sebengkah ari tiga batang langgur ti dipejalaika nengah Program Sadia-Apan.
Asil pansik ke udah digaga orang pasal penanggul enggau pemujur ba pengawa sekula, deka nyadi penemu keterubah dipekunsi enggau bala apaiindai, lalu semina apai indai ke udah ngulu sesi penerang nya aja ke ulih nganjung anak ngagai program nya, ku iya.
“Tiga batang program tu (‘Learning Awareness & Study Smart’), keterubah, nguji bekunsi runding, perangai enggau pengawa ti dikereja orang ke udah mujur ba pengawa sekula. Laban enti kitai ulih nitihka runding, perangai enggau pengawa orang ti udah mujur, tentu peluang kitai deka mujur pan besai.
“Kedua, kitai nguji muka runding nembiak enggau chara bekunsika penemu ti udah ditemu raban sainstis pasal ‘pemesai kuasa’ enggau ‘chara’ untak ke dikembuan kitai siku-siku ‘gawa’ tauka ‘berunding’ sereta chara kitai ‘ngingatka’ utai.
“Theory PDP ( Parallel Distributed Processing) ke bisi dipekunsika kitai tu mega teori ti mujur dikena orang ngaga robot ke nemu berunding lalu besaut-tanya enggau kitai (Artificial Intelligence).
“Ketiga, kitai ngunji bekunsika chara muntang (tips & trick) ke ulih dikena nembiak nambahka pemereti ngagai utai ke dipelajar, numpuka runding enggau ngingatka utai ti dipelajar,” ku Andrew.
Iya mega madahka SadiaKrian bekunsi chara belajar enggau ti engkeman baka SQ3R, ti jauh muntang sereta ulih nulung kitai ke nadai ngena sebarang chara tauka strategi belajar.
Chara deka belabuh nitihka ke orang ke udah nyulut mega dipekunsika, laban nya siti pekara ti chukup beguna ngagai nembiak ke udah jauh tinggal ba pengawa sekula tang agi deka nguji nitihka orang.
Apin lama, dikena ngemujurka Program Penyaup Pengawa Sekula, Sadia-Krian ku Andrew udah numbuhka Raban Pemeri Runding Ari Luar ti nulung ngemata sereta ngemansangka Program Sadia-Apan nya.
Sadia- Krian udah milih tiga iku orang ti datai ari bidang pengawa sekula iya nya Professor Madya Dr. Jennifer Tunga Janang, Professor madya Dr. Bromely Philip enggau Danggat A. Chabo ti benung ngambi Phd ba UNIMAS, ti dipilih sereta besetuju nyadi penyanding penemu Program Sadia-Apan.
“Aku berasai gaga amat ati laban kitai mujur ngaga kaul entara orang bepengelandik mansik utai ba bidang kejuruteraan enggau borang bepengelandik mansik utai ba bidang akademik.
“Ngelama tu kitai ngasaika mensia mayuh apin meda pangka pengawa mansik dalam bidang kejuruteraan maya pengelandik nya dibai ngagai pengawa sekula.
“Diatu lebuh pengelandik nya dichampurka enggau pengelandik mansik ba bidang akademik, kitai ngasaika bisi bendar pengelebih,” ku Andrew madah ngagai Utusan Borneo.
Berebak enggau tu lebuh ti ngenang pasal ‘Learning Awareness & Study Smart’ Prof. Madya Dr. Bromeley madahka, nya sebengkah program ke chukup engkeman.
“Program ‘ Learning Awareness & Study Smart’ tu engkeman amat ba aku laban ukai semina numpu ngagai ‘pengawa meransang runding’ nembiak ba pengawa sekula tang mega nyengkaum bekunsika ‘ penemu chara berunding’(Cognitive & Metacognitive).
“Aku empu bisi mega ngaga pansik pasal penemu Cognitive & Metacognitive tu ba universiti, nya alai aku ngasaika tu penemu ke amat beguna sereta patut ditemu nembiak sekula, laban penemu ti baka tu ulih nulung nembiak ba pengawa sida ke benung belajar,” ku Bromeley.
Nambahka nya, Professor Madya Dr. Jennifer Tunga Janang madah program ‘Learning Awareness & Study Smart’ pekara ti baru ba kitai bansa sereta patut dikerembaika.
Bepelasarka peneleba nyempulang program sekula ngelama tu ku iya, tang pekara nya enda sama.
“Program tu engkeman laban ditusun sereta diterang ngena tusun penemu nyengkaum asil pansik ti udah dipasik, udah diterima sereta udah dipelajar tauka dipejalaika orang dalam bidang akademik.
“Nya alai aku ngasaika program ti baka tu endang patut dikerembaika ngagai nembiak kitai bansa.
“Aku mega ngasaika program ti baka tu segi patut disaup semua kitai awakka ulih ngerembai lalu mantu pejalai pengawa belajar nembiak lebih agi nembiak kitai di menua ulu,” ku Jennifer.
Kelimpah ari nya Andrew madahka Sadia-Krian mega ngemeranka ‘ Learning is Fun’, nitihka pansik orang, nembiak ke nemu chara belajar ti betul endang ngembuan ‘Pengerindu sereta Pengeransing’ ba pengawa belajar.
Nya alai enti nembiak nya dipeda enda ransing ke pengawa belajar, nya endang bisi ‘penyakit’. Lalu penyakit ke pemadu mayuh udah ditemu iya nya ngemeranka chara belajar baka ti macha surat kabar.
Lalu nya chara belajar ti salah laban pengudah 10 minit utai ti dibacha enda ulih dikeingatka, ku Andrew.
“Nyadi Program SadiaApan tu siti palan ke digaga endur kitai ngiga penyakit nembiak ba pengawa sekula. Tang segi amat sebaka enggau penyakit, ambika sema, penyakit udah ditemu tang enti enggai ‘berubat’ tauka ‘bepenti’, penyakit nya tusah deka gerai,” ku iya.
Entara program dalam Sadia-Apan ku Andrew iya nya ‘Program Ngintu Pengelandik Asal Bansa Iban Dalam Babas’.
Program tu nguji meri nembiak rebak baru peluang belajar lalu ngasaik ngereja pengawa asal kitai bansa dalam babas, ambika chunto, baka pengawa empulut, ngetan bubu enggau ke bukai.
Ku Andrew, program nya bisi 3 iti pengambi, keterubah, kitai nemu pengawa meri penemu ngagai nembiak tu enda sebaka enggau kitai ti nuangka ai ngagai tajau, tang begunaka chara ke ulih muka runding.
“Nya alai, enti nitihka langgur asal maya palan Apan tu tembu, kitai deka meri awak ti besai alai nembiak berunding.
“Ketegal nya, kitai nyelit ke program Penemu Asal Dalam Babas ke dalam program belajar sida. Enggau chara tu kitai ngansalka sida bisi awak ngereja pengawa asal aki-ini sida kelia maya dalam babas, lalu ulih ngintu enggau nyambung pengawa asal nya.
“Ba pengambi ketiga, kitai ngarapka uluh nempa pengerindu enggau penyayau ngagai utai dalm kampung, baka rampa menua, sungai enggau kayu babas,” ku Andrew.
Ku Andrew ke diatu program nya bedau ulih dikereja 100 peratus sereta semina ulih bekunsi penemu nengah chara licha.
Danggat bepenemu Program Ngintu Pengelandik Asal Bansa Iban Dalam Babas siti ari langgur Program Sadia-Apan ti manah sereta patut dipejalaika, ku iya.
“Taja pan palan ti meruan ti disadang endur bejalaika program tu bedau tembu (Apan talent Development Center), tang aku ngasaika program tu udah ulih berengkah sereta aku empu deka enggau nguji ngatur program tu.
“Ba aku program ti baka tu engkeman amat ngagai nembiak kitai bansa ke diau ba mengeri lalu jarang pulai ke menua,” ku Danggat.
Langgur kedua, program Sadia-Apan ku Andrew, be- ratika pengawa mansik, lebih agi ba bidang pasal penanggul enggau pemujur ba pengawa sekula.
Asil pansik endang mayuh sereta deka dipekunsika dalam program Sadia-Apan, tang ku iya tebal agi pansik nya dipejalaika orang ari menua bukai.
“Nya alai kitai ke bisi ngembuan pengerindu mansik, segi mayuh peluang tauka utai ti apin dipansik orang bukai lebih agi pasal bekaul enggau kebuah seretra chara mutarka penanggul tauka chara nempa pemujur ba pelajar sekula kitai bansa,” ku Andrew bepenemu nya pekara patut dikemekuhka enti deka nitihka singkang bansa orang bukai.
Langgur ketiga, SadiaKrian nengah program nya deka numbuhka komiti ti ulih nulung sereta mantu nembiak awakka ulih ngena scholarship ari menua luar tauka scholarship universiti menua luar.
Andrew madahka mayuh langgur program diatur tang semua nya deka mujur enti bisi sukung enggau bantu ari semua piak.
Program Sadia-Apan dipejalaika ngena chara worksyop dalam timpuh 5 hari ungkup nembiak Pom 1 ngagai Pom 2, tang ku iya, program ke sama ba bulan September tu deka diatur sehari ngena chara licha ungkup nembiak Pom 4 ke atas, ti dipejalaika ba Indu Opis Serakup Dayak Iban Sarawak (SADIA) di Batu 7.
Timpuh program nya diatur bebida laban nembiak Pom 3 ke baruh begunaka mayuh aktiviti awakka ulih nerang reti ti lebih silik ngagai nembiak, dibandingka enggau Pom 4 ke atas ulih diterangka ngena chara licha.