Pengari rayat terus nagih semaya nirika begunan kedai LCDA di Matu
MUKAH: Semaya Lembaga Pembangunan Dan Lindungan Tanah (LCDA) ti deka nirika rumah kedai di Pasar Matu terus ditagih.
Kaban kunsil Nengeri (ADUN) Jemoreng Datuk Dr Juanda madah, iya enggai dituduh enda ngamatka semaya ngagai rayat nyentukka diatu.
“Semaya ngagai rayat patut dikeamat, kebendar nya aku udah tiga kali nanya pekara tu dalam Kunsil nengeri (DUN),” ku iya madah ngagai Utusan Borneo.
Taja pia, ku iya, saut ke diberi piak ke megai tanggungpengawa nya seruran madah agi ba tikas pansik belama.
Ku Juanda, nya mega kebendar enda nyengkaum lima kali iya udah ngatur aum enggau piak pengatur tetinggi LCDA ti enda meri asil ke positif nyentukka diatu.
Juanda madah, projek begunan rumah kedai LCDA dilanggur deka diengkah ba mua Opis Kaunsil Pelilih Matu.
“Projek nya dipadahka kena bulan April 2017 iya nya sama hari enggau madah agih belanja ungkup masjid ti deka tembu kena bulan November tu, tang naka ke diatu nadai udah dipeda begunan LCDA nya didirika,” ku iya nerang.
Dikena ngamatka semaya ti udah dipadah, nya patut dipejalaika enggau naka pengelengkas ungkup pemaik semua.
“Kitai semina nagih semaya ti udah dipadah, enda lebih ari nya lalu semaya nya patut dikeamat,” ku iya.
Piak perintah nengeri mega ku iya patut berundingka inisiatif ke patut ngambika penangguh projek bansa nya enda nyadi agi.