DAP Kapit deka terus ngerembai
KUCHING: Tembu Pengawa Bepilih Besai Ke-14, DAP pampang Kapit nerima mayuh amat peminta ungkup orang ti deka masuk nyadi kaban parti nya lebih agi sida ke nguan menua Kapit.
Sekretari DAP pampang Kapit Larry Asap madah pengudah PRU14, Pakatan Harapan mujur numbuhka perintah baru lalu ngubah gaya politik di Sarawak.
Pelilih Kapit ku Larry nambah, bela nerima empas ari pemutus PRU14 ke diatur ba bulan Mei nya.
“Kapit ke ba tengah Negeri Sarawak diuan majoriti bansa Dayak lalu sida keran minta disengkaum ba Malaysia baru.
“Aku nerima mayuh pinta ari raban bansa Dayak di Kapit ti deka masuk parti DAP di Bukit Goram,” ku iya nengah surat penerang berita kemari.
Kelimpah ari Bukit Goram ku iya, pekara ke sama mega nyadi di Sitak Kunsil Nengeri ( DUN) Katibas, DUN Pelagus enggau DUN Baleh.
Nitihka penerang Larry ke nyadi Protem Chairman DAP Bukit Goram, seduai Protem Chairman DAP Katibas Paren Nyawi udah nganjung pom numbuhka pampang nuju Opis Pengerijista Gerempung (ROS).
Nambahka nya, iya netapka ba pengujung bulan Ogos dua iti agi pampang DAP deka ditumbuh iya nya DAP Baleh enggau DAP Pelagus.
“Pengawa numbuhka semua pampang tu deka ngenegapka agi DAP di Pelilih Kapit,” ku Larry.
Dikena nentuka semua pampang di Kapit ngemujur pengawa ke udah ditusun, Larry madah palan servis DAP di pasar Kapit deka mindah ngagai endur baru, iya nya besai agi ari ke udah.
Palan servis baru tu meseti ulih nerima enda kurang ari 100 iku orang lalu deka dikunsi semua pampang ke udah ditumbuh ngelingi Kapit, tandu iya.
Enti kitai teulihka kuasa otonomi pulai, nengeri tu ulih ngintu diri ungkup raban nembiak jemah ila. Kc Tan Pengari S4S
Nitihka pengari S4S Kc Tan, manifesto nya meratka enam pekara ke tau ngenegap ekonomi nengeri sereta ngangkatka penatai pemisi rayat.
Enam pekara berat ba manifesto ke tau ngaga reformasi sereta ngenegap institusyen iya nya, Sarawak bisi sistem pekara wang ngatika diri, Petros deka nguasa semua pengawa minyak enggau gis di Sarawak, Sistem pelajar Sarawak ke baru, Sistem pengerai Sarawak ke baru, Sistem ngenanka Sarawak ke baru enggau Kuasa ba pekara imigresen.
“Enti kitai teulihka kuasa otonomi pulai, nengeri tu ulih ngintu diri ungkup raban nembiak jemah ila,” ku Tan ba aum pengarang berita di Kuching kemari.
Iya madah manifesto nya udah dianjung ngagai Kepala Menteri di Komplek DUN ensanus lalu bisi mega di- anjung ngagai Sapit Kepala Menteri Tan Sri James Masing.
Kelimpah ari nya, Menteri Opis Kunsil enggau Berumah Datuk Dr. Sim Kui Huan enggau Menteri Dagang Temuai, Seni, Main Asal, Nembiak enggau Lumba Datuk Abdul karim Rahman Hamzah bela bisi dianjung manifesto nya ensanus.
Semua 82 pengari rayat (DUN) deka nerima salin manifesto nengah email ke dikirim kemari.
Ngenang kaul ke sama, ‘ The Sarawak Manifesto@ 2018’ ku Tan dekaka Bank Pemansang Sarawak (DBOS) digaga nyadi bank komersyel ngambika peranak Sarawak ulih muka akaun sida ba bank nya.
Bank bukai ( ari luar Sarawak) ku iya meseti ngagihka 30 peratus syer ngagai peranak Sarawak, ngeluarka baru stem Sarawak enggau ngeluar mata duit Sarawak lalu numbuhka Wang Turu Pengelantang rayat Sarawak.
Ba sentang minyak enggau gis, manifesto S4S netapka perintah nengeri patut ngempu sereta nguasa semua pengawa bekaul enggau pengeraja asal nya.
“Sarawak patut neritka Ordinan Ngali Minyak enggau Gis 1958 lalu ngetuka operasyen kompeni ti enda nitihka penetap Petros sebedau 31 Disember taun tu,” ku Tan.
Ba aum pengarang berita nya Tan madah ninting hari penyampau 850,000 tung minyak dipansutka Sarawak lalu nya manggai US$51,000,000 sehari (bepelasarka rega setung US$60).
Nengah pemisi nya ku Tan, Sarawak bisi belanja ke chukup dikena ngemujur projek pemansang kelimpah meri tetiap iku peranak nengeri tu RM4,412 setaun.
Pekara nya pia enti 40 peratus ari bayar royalti minyak diberi ngagai Wang Turu Pengelantang Rayat Sarawak (bepelasarka penyampau tubuh diatu 2.7 juta iku).
Belanja nya mega deka nentuka Sarawak ulih nyendia servis pengerai enggau pelajar perchuma ungkup rayat ditu.
“Pemisi nya mega deka meri pengelantang ngagai Perintah Nengeri melanja mayuh agi pelajar Sarawak enggau atlit ba program akedemik renggat entarabangsa enggau pekit lumba,” ku Tan.
Ngenang sentang atur ngenanka Sarawak, manifesto S4S dekaka Sarawak Rangers, iya nya Sarawak Border Scouts ditumbuhka baru lalu pia mega numbuhka unit pengintu kandang tasik Sarawak.
Ba sentang kuasa ba pekara imigresen, manifesto netapka passport Sarawak dikena baru lalu peranak ari nengeri bukai ke tama ngagai Sarawak meseti ngena passport.
“Manifesto mega minta Sarawak nyendia status PR ngagai peranak ari menua luar ke landik ke deka gawa di nengeri tu,” ku Tan.