Projek Jalai Besai S’wak Ke-2 patut ditangguh Diatu kitai begunaka duit dikena ngemanah sekula ke udah repuk di nengeri tu
KUCHING: Mandal Chairman Parti Keadilan Rakyat (PKR) Sarawak See Chee How minta perambu Projek Jalai Besai Sarawak ke-2 ditangguh ke dulu.
Bejaku ba aum pengarang berita di Kuching kemari, iya madah ungkus projek ke manggai RM4 nyentuk ngagai RM6 bilion nya patut dikena ba pekara bukai.
“Nadai kebuah ke nyemetak projek nya patut dikemerat ba maya diatu. Kitai udah bisi Projek Jalai Tebing Pantai enggau Projek Pan Borneo ke benung digaga.
“Diatu kitai begunaka duit dikena ngemanah tauka nganti sekula ke udah repuk di nengeri tu.
“Lalu pia mega kitai patut nyendia infrastruktur ke diguna peranak di menua pesisir baka ke bekal lektrik enggau ai,”ku See.
Rambau Aum Dewan Undangan Nengeri(DUN) ba bulan Julai tu tadi, Menteri Pemansang Infrastruktur enggau Perengka Pengangkut Tan Sri James Masing bisi mantai perambu Projek Jalai Besai Sarawak ke 2.
Masing rambau mantaika perambu nya madah jalai besai Sarawak ke-2 nya ulih ngemandak pejalai perengka pengangkut.
Nitihka penerang See ke mega Kaban Kunsil Nengeri (ADUN) Batu Lintang, projek nya mungkur 3 seksyen.
Keterubah ku iya ari Kota Samarahan nuju Roban iya nya urung 112 kilometer(km) lalu digaga nitihka stindit JKR R5 2 alur.
“Seksyen kedua deka nyambung Sebuyau nuju Sri Aman/ Betong, iya nya urung 94 km lalu diperambu digaga nitihka stindit JKR R5 2 alur
“Seksyen ke tiga nyengkaum pengawa ngemanah Jalai Kelupu/Jalai Tanjung Genting nuju Jematan Lanang di Sibu ke alai jalai nya digaga besai agi iya nya ari 2 nyadi empat alur nitihka stindit JKR R5,’ku See.
Ngenang kaul ke sama, iya madah jalai tebing pantai ke nyambung Kota Samarahan nuju Roban diatu urung 155 km pemanjai lalu pejalai entara Sebuyau nuju Sri Aman/Betong ke mansa jalai tebing pantai enggau Pan Borneo urung 117 km.
Mayuh orang merunding jalai besai Sarawak ke 2 ulih ngemandak pejalai, tang pekara nya enda pia, tandu See.
Berindik enggau nya iya nyangkal tuduh Masing lalu pechaya jalai besai ke 2 nya semina nyadika pilih aja pengudah bisi jalai tebing pantai enggau Pan Borneo.
Nadai kebuah ke nyemetak projek nya patut dikemerat ba maya diatu. Kitai udah bisi Projek Jalai Tebing Pantai enggau Projek Pan Borneo ke benung digaga. See Chee How Mandal Chairman PKR Sarawak