Belanja kelimat ari Projek Pan Borneo dikearap ulih ngemanah sekula repuk
KUCHING: Kaban Kunsil Nengeri (ADUN) Batu Lintang See Chee How ngarap ulih ngelimat sekeda belanja ari projek kelebih agi Projek Jalai Besai Pan Borneo.
Berindik enggau nya, iya ke baru dichiri nyadi pemantu ‘khas’ Menteri Kereja Raya (Baru Bian) di Sarawak madah meratka atur matau pejalai Projek Jalai Besai Pan Borneo enggau projek bukai di nengeri tu.
Belanja ke dikelimat nya ku iya ulih dikena ngaga baru tauka ngemanah sekula repuk di nengeri tu.
“Pekara ke berat diatu iya nya ngelengkas pengawa ngaga baru tauka ngemanah sekula repuk di Sarawak.
“Kitai ngarap ulih ngelimat sekeda belanja ari Projek Jalai Besai Pan Borneo lalu ngarap kabinet setuju diak sekeda tauka semua duit ke dikelimat tu ulih diberi ngagai Sarawak,’ku Iya.
See mansutka jaku nya ba aum pengarang berita di Opis Parti Keadilan Rakyat (PKR) di Batu Tiga ditu, kemari.
Iya madah duit nya ila deka disimpan di Opis Menteri Pelajar enggau Opis Menteri Kereja Raya.
Ngenang sentang pejalai Projek Jalai Besai Pan Borneo, See ke mega Mandal Chairman PKR Sarawak madah projek nya tetap deka digaga berari.
“Duit sigi udah bisi ba Opis Menteri Kereja Raya. Kuntrektor enda diketu lalu deka ngaga projek berari.
“Enti bagi pengawa sida udah tembu lalu disetuju, sida deka dibayar,’ku iya.
Ba sentang atur merundingka baru kuntrek Projek Jalai Besai Pan Borneo, iya netapka randau nya semina entara perintah enggau Private Delivery Partners (PDP).
Ku iya randau patut diputus ba bulan September tu tang randau nya enda ngasuh projek tau kereja di diketu.