Penumbuh GPS seriris enggau juluk perintah nengeri ngetanka hak Sarawak
MIRI: Pengawa numbuhka Gabungan Parti Sarawak (GPS) ari bala ketuai nengeri pengudah Pengawa Bepilih Besai Ke-14 (GE14) seriris enggau juluk perintah nengeri ti keran nentuka nengeri tu seruran mansang ke mua sereta maju.
Sapit Kepala Menteri Datuk Amar Douglas Uggah Embas madah GPS, bediri ari empat ex-komponen parti Barisan Nasional (BN) Sarawak – Parti Pesaka Bumiputera Bersatu (PBB), Parti Sa’ati Rayat Sarawak (SUPP), Parti Rakyat Sarawak (PRS) enggau Parti Demokratik Progresif (PDP), deka meruan nyadi perintah nengeri ba Sarawak taja nyadi penyakal ba renggat perintah besai.
“Pengudah ngasaika mayuh macham peneleba sebedau, penemu pemadu manah ngagai kitai iya nya numbuhka Gabungan Parti Sarawak ngambika kitai ulih ngetanka hak enggau peminta Sarawak.
“Kitai meseti nentuka Sarawak seruran dikemansang, beserakup sereta meruan dipegai peranak Sarawak ngambika semua reta enggau kesemua iya deka nguntungka peranak Sarawak,” ku Uggah.
“GPS nyadi perintah nengeri netapka penemu deka nyaga tanah Sarawak laban ba Sarawak kitai ada, ditu kitai idup lalu ditu kitai deka pulai,” ku iya nambah.
Uggah mansutka jaku tu lebuh bejaku bejadika Mardi Gras Lambir ba padang bol Sekula Primari (SK) Lambir Village ditu, apin lama ke udah.
Nitih ku Uggah, mayuh udah pengawa dipejalai kenyau ari Datuk Patinggi Abang Johari Tun Openg dipadu gawa nyadi kepala menteri.
Tu nyengkaum ngemendarka Sarawak Oil Mining Ordinance ( OMO) dikena nentuka minyak enggau gis nengeri deka diserungkai, dipatau enggau diempu peranak Sarawak.
“Nya alai kitai enggai betimbal jaku enggau Chong (chairman PH nengeri Chong Chieng Jen), laban kitai ukai semina minta bayar royalti aja tang kitai mega minta semua hak minyak enggau gis dikuasa peranak Sarawak nengah OMO,” ku Uggah.
Kedua, perintah nengeri udah netapka ‘Pemakai Menua’ enggau ‘ Pulau Galau’ dalam Adat Iban ba tanah udah bisi kuasa undang-undang lalu undang- undang udah dikemendar.
“Tu ngayanka iya (Abang Jo) chukup berani mutarka penanggul ba tanah kitai di Sarawak kemaya hari.”
Uggah madahka dalam timpuh lebih setaun pengudah Abang Johari mangku pengawa, iya mega udah ngemendarka projek berega RM5.5 juta ba nengeri tu enggau beberapa ke bukai benung diatur.
“Kitai ulih ngereja pengawa tu laban kitai begempung enggau ketegal kitai megai perintah nengeri,” ku iya.
Iya meri jamin ngagai rayat ke alai GPS deka nentuka program pemansang dipejalaika perintah nyengkaum sida ba kandang menua pesisir deka ditampung, laban nengeri tu dipegai bala ketuai ti bepenau, ti mega chukup inklusif belalauka jaku pemansang sida.
“Kitai mega bisi pemansut ti ulih dipechaya enggau netapka Sarawak deka maju.
“Kitai deka nentuka sebarang pekara nyadi, Sarawak deka seruran nampung program pemansang iya lalu kitai deka bejalaika program diri,” ku iya nambah.