Biro Indu patut ditumbuh ba rumah panjai dikena ngaul pengawa dagang
JULAU: Kaban Kunsil Nengeri (ADUN) Meluan, Rolland Duat berunding deka numbuhka biro indu ba tetiap rumah panjai ba sitak menua dipegai iya nyadi peransang nempa sida ke indu ba pengawa dagang.
Ku iya, ngelama tu raban indu dikumbai manah agi ngintu pengawa ba rumah aja, tang ke amat sida nampung pengelandik ari rebak dulu ti ngembuan pengulih tinggi ngangkatka sida ba penuduk dunya dagang.
Ari pengelandik ti ditampung sida ulih nganyam tikai, betenunka pua kumbu enggau asil kraf jari bukai, ku iya beambika chunto ti bisi rega tinggi ba makit menua tasik.
“Bala indu kitai udah bisi pengelebih ari sukut pengelandik, kelebih agi ngaga kraf jari. Ba penemu aku, tu awak chukup engkeman mantu sida ngulihka belanja ari pengelandik ti dikembuan sida,” ku iya nandu.
Rolland, lebuh bejadika pengawa ngelanchar Biro Indu ba Rumah Sang, Rantau Chire, Ulu Entabai semak ditu kena Hari Enam tu tadi madahka iya deka beratika pekara tu nitihka pematut dikena nentuka Biro Indu tau nyadi pelasar ngagai raban indu ngaul diri ba dagang.
Taja kitai benung berunding ngambika sida ulih ngaul diri ba dunya dagang kemaya hari, kitai mega meseti berunding nyikap diri ngena penerang enggau teknologi pemadah laban kitai nuju e-dagang, ku iya ngelalau.
Iya minta raban indu ba rumah panjai di Meluan gawa rat begulai enggau iya ngambika biro indu nyadi institusyen dikena ngubah pengidup sida menyana agi.
Ku Rolland, iya temegah ati lebuh berati naka diatu, urung 109 ari 200 buah rumah panjai ba sitak iya nya udah numbuhka biro indu sida empu.
Taun tu, iya udah ngagihka RM300,000 ari belanja Projek Mit Pemansang Menua Pesisir (MRP) dikena mantu numbuhka biro indu, ku iya, seraya nambah, iya ngarapka rumah panjai ti apin numbuhka biro indu sida numbuhka biro indu sida enggau jampat sereta ngasaika pengelebih ti diberi ngagai sida.
Ba taun dudi, iya deka nampung pengawa ngagihka belanja MRP ungkup puku operasyen Biro Indu, ku iya serata mantaika pengandal sida deka mansang belubah ba dagang diri.
Kelimpah ari geran MRP, iya mega deka beratika chara bukai dikena nyadika ICT enggau program latih e-dagang ungkup bala kaban Biro Indu, ku Rolland besemaya.
Berebak enggau nya, Rolland bisi ngemendarka pemeri penyampau RM2,000 ngagai tetiap 35 biro indu besemak ti nganjung pengari sida ngemataka pengawa ngelanchar nya.
Nitih ku Rolland, pemeri nya tambah ngagai belanja ti udah diagihka iya beserimbai enggau pengawa rejista 87 biro indu ti baruh ditumbuh apin lama ke udah.
Iya mega meri jamin perintah nengeri deka ngelengkaska langgur nirika mayuh agi tiang komunikasyen ba kandang menua pesisir dikena nambahka bungkur internet sereta mega ngangkatmanahka sambung jalai.
Antara bala bisi datai iya nya Tuai Rumah Sang Lasa, chairperson ari 35 biro indu besemak, bala pengari ari mayuh bengkah opis sereta bala ketuai komuniti.