Dr Teo: Perintah PH deka seruran ngintu pengelantang orang berikan
MIRI: Perintah Besai Pakatan Harapan (PH) ti baru endang deka seruran ngintu pengelantang raban berikan nyengkaum ba Sarawak.
Kaban Parlimen (MP) Miri Dr. Michael Teo madahka Perintah PH nengah Opis Menteri Bumai enggau Industri Betanam Betupi apin lama ke udah meri jamin ke alai belanja elawin idup enggau insentif bukai baka subsidi diesel ti udah diasaika raban berikan kenyau ari taun 2008 deka ditampung.
“Pengudah atur pengawa diambi Perintah PH, tebal agi bala komuniti berikan enda nemu sekalika insentif ti diberi perintah besai sebedau tu deka ditampung perintah kemaya hari.
“Nya alai, ari jamin nya, nadai agi isu bekaul enggau kededua pekara laban PH endang udah terang madah sereta komitmen kitai nampung pejalai insentif ti diberi ngagai raban berikan,” ku iya nerang.
Dr. Teo mansutka jaku nya rambau pengawa bejadika Pasar Nelayan Batu Satu Opis Pemansang Pengawa Berikan Malaysia (LKIM) Wilayah III Miri, di Kuala Baram kemari.
Sama bisi datai Sapit Direktor Makit enggau Lesen LKIM Mohd Rizal Sahari, Pemesai Wilayah LKIM Wilayah III Miri Norlaili Baharuddin @ Hamdan, Chairman Serakup Raban Berikan Sitak Miri Musa Bujang enggau Menijar Besai Serakup Raban Berikan Sitak Miri, Malik Bol.
Berindik ari nya Dr. Teo mega meri jamin enggau komitmen ngagai raban berikan di kandang menua nya ngambi mutarka isu kapal berikan menua luar ti tama belalai ba kandang tasik Miri.
Ngelansa pasal projek ngintu kandang tebing tasik ungkup Kampung Batu Satu ti udah dikemendarka perintah besai sebedau tu, Dr. Teo nerangka iya deka ngemai pekara nya ngagai Perintah PH.
Berebak enggau nya ku iya, iya dekaka kerejasama enggau pemereti ati ari semua rayat ditu ke alai Perintah PH udah ngemai projek ti udah dikemendar perintah sebedau tu ba perati sida.
“Ari gaya ekonomi diatu, kitai deka meri pemerat enggau ngemeratka projek ti meri pemaik agi ngagai rayat,” ku iya nambah.
Dulu ari nya ba jaku bejadika pasar berikan nya, Dr. Teo ngarapka pasar baru nya deka mantu mansutka penatai pemisi ngagai raban berika sereta seruran nyediaka bekal produk tasik ti idup ngagai sida ti meli.
Ba lansa bukai, nengah penerang berita LKIM Wilayah III Miri, pasar berikan baru ti beungkus RM176,000 udah tembu digaga kena 15 March taun nyin tadi.
Ari pemisi 20 bangsal, tu nyadi pasar berika keempat ba Miri pengudah Pasar Nelayan Kuala Baram, Pasar Nelayan Piasau Utara enggau Pasar Nelayan Luak. KAPIT: Kaban Parlimen (MP) Kapit Datuk Alexander Nanta Linggi enggau Kaban Kunsil Nengeri ( ADUN) Bukit Goram Jefferson Jamit Unyat, Sekretari Politik Kepala Menteri Sarawak Maurice Giri enggau Pemesai Pelilih Bukit Mabong Douglas Pungga nyempulang urung 700 iku temuai bansa Foochow enggau sida ke bukai begempuru ba Palan Sivik Kapit ngulu Pengerami Ngintu Genap Taun Ke-90 Serakup Foochow Kapit, kena lemai Hari Enam tu tadi.
“Aku meri jaku puji ngagai Chairman Pengatur, Sii Bang Ee, sereta bala komiti pengatur bukai ti udah mujur ngatur pengerami tu. Aku chukup lantang ati suah dikangau berami begulai, baka malam tu, enggau penatai bala ketuai komuniti Foochow ti datai ari sekayu menua; Semenanjung, Sabah, Brunei, Labuan enggau Sarawak empu.
“Tu pekara baru ba aku empu sereta berasai temegah ati ulih betemu enggau pemesai baka Dato Sri Lau Wei Kiong ti nyadi Sapit Presiden Serakup Foochow Dunya,” ku Nanta.
Ari penemu dipelajar iya, bansa Foochow ari menua China datai ke Kapit dalam pun taun 1928, ke alai niang Wong Nai Siong datai ke Sibu, Sarawak dalam taun 1901. Niang mai lebih 300 iku, nitihka jerita bakih iya tin emu pasal komuniti Foochow enggau peturun Foochow selampur nengeri.
Ngelansa pasal pemansang, Nanta ngelalau semua patut bisi bekerejasama rat taja udah nyapai mayuh pemujur. Komuniti Foochow lebih 90 taun udah nguan menua Kapit.
“Aku nemu lebuh peturun kita datai kitu 90 taun ke udah, gaya pekayan kita bisi bida tang diatu kitai ulih temegah ati meda gaya pendiau ti menyana sereta bisi reta.
“Enti kitai berati, sida diatu gawaka rayat ari pejalai pengawa Tanggungpengawa Rama Korporat (CSR) nengah pengawa pengasih, pemeri ti ngaul awak sida ngelimpangka diri sereta mantu ukai semina komuniti Foochow aja tang mega ari komuniti bukai. Sida ngena awak diri berandau enggau rayat,” ku Nanta.
“Kapit tu menua ti diuan pupu bansa baka Iban, Foochow, Kayan-Kenyah, Malayu, Hockien, Kwang Tung sereta mega bansa Beketan ti semina bisi ba Sarawak, diau ba Nanga Merit ditu lalu urung 2,000 aja tubuh sida.
“Taja pia, rayat pupu bansa diau bebaik sereta beserakup enggau pangan diri. Pekara pemadu manah iya nya semua kitai bejalaika pangku pengawa ngemansangka Kapit. Aku nemu nyangka bedau chukup, tang anang ngumbai kitai bedau mansang, kitai enda maju.”
“Pasar sekut, mayuh kerita, nadai endur paking kerita. Sigi amat Kapit tu pasar menua ulu tang ukai agi nyadi menua ti seranta. Kitai meseti ngenang pengawa ti udah digaga perintah.
“Anang nyebut pekara 20 taun ke udah. Sebut lima tauka enam taun, mayuh ubah dibai perintah. Lima taun sebedau tu, kitai nadai jalai ngelawa Song. Mayuh pemansang dalam timpuh lapan taun ke udah diberi perati perintah sebedau tu.
“Nya kebuah kitai meseti ngenang nama ti udah bisi lalu kitai patut bendar agi gawa, ngambika bulih mayuh agi.
“Aku meri tabi puji ngagai Serakup Foochow Kapit, beberapa taun ke udah, bala komuniti kita udah nerima pemansang besai ari perintah. Bala kita sigi patut bekerejasama rat enggau aku, Sapit Kepala Menteri Sarawak Tan Sri Datuk Amar Dr James Jemut Masing, ADUN Bukit Goram Jefferson Jamit Jamit Unyat, ADUN Pelagus Wilson Nyabong Ijang. Kami semua deka mantu,” ku iya nandu.
Ku iya, ari perintah Balai Mayuh Guna Foochow beungkus RM500,000 sereta mega RM500,000 ungkup pengawa nyungkur tanah enggau infrastruktur ba pendam baru ba Jalai Antaroh ditu.
Berebak enggau pengerami nya, Nanta bisi nyuaka chek ari Perintah Nengeri penyampau RM500,000 ngagai Chairman Serakup Foochow Kapit, Sii Bang Ee, dikemata bala kaban komiti bukai.
Antara pemesai bisi datai Pemesai Pampang Khas ASP Chua Su Hua, Presiden Gerempung Serakup Foochow Malaysia Dato Sri Lau Wei Kiong, Mandal Presiden Gerempung Serakup Foochow Malaysia Dato Sri Wong Ing Soon, Presiden Gerempung Serakup Foochow Sarawak Dato Ngu Pui Seng, Patron Serakup Foochow Kapit Dato Vincent Lee, Chairman Serakup Foochow Limbang Dato Wong King Hoong, Chairman Serakup Foochow Sarikei Kapitan Lau Hieng Moon sereta bala ari 43 bengkah Serakup Foochow ari Semenanjung, Sabah, Brunei, Labuan enggau Sarawak.