Program diatur PH Sarawak majak nerima timbal ke manah ari rayat
KUCHING: Pakatan Harapan (PH) Sarawak lantang ati enggau timbal ti chukup manah ari mensia mayuh ba aktiviti enggau program ti diatur parti komponen sida ba nengeri tu, taja diatur ba jam kepenudi.
Ketuai Nembiak Parti Tindakan Demokratik (DAP) Sarawak enggau PH Sarawak, Mordi Bimol madah timbal nya mega ngayanka rayat diatu nerima PH lalu badu agi bisi ati nangi ngaul diri ba aktiviti ti diatur parti nya baka sebedau tu.
Ambika chunto, ku iya, atur pengawa ‘Rocket Cup Football Tournament’ ti dipenyadika iya kemari, nerima timbal chukup manah taja pekit nya ditatak semina 32 tim aja.
“Tu nunjukka mayuh agi raban nembiak diatu berani ngaul diri semak enggau kitai, Taja diatur ba jam kepenudi, tang timbal diterima kitai chukup manah. Sebedau tu, bala komuniti nangi dikaul enggau PH, Parti Keadilan Rakyat (PKR) enggau DAP.
“PH sebedau tu enda baka PH ke diatu (laban diatu kitai nyadi perintah besai). Pekit tu siti ari chara kitai ngaul diri semak enggau rayat, enti enda ngelala, sigi nadai pengerindu,” ku iya lebuh bejaku rambau atur pengawa Mambong Rocket Cup Football Tournament di Siburan ditu, kemari.
Sama bisi datai Kaban Parlimen (MP) Puncak Borneo, Wille Mongin ti mega bemain dalam tim iya (Tim Willie) ba pekit mungkal ngelaban tim SDFC ari Kampung Sira rambau pekit nya.
MP Bandar Kuching, Dr Kelvin Yii, Chairman DAP Mambong, Chan Hon Hiung enggau Sapit Chairman iya, Sanjan Daik antara temuai ke bisi datai rambau atur pengawa nya.
Ba lansa bukai, Dr Kelvin dalam jaku dipansutka iya madahka pekit nya nyadi chara pemadu manah dikena ngemansang enggau ngambuh penau baru ngagai bala rebak nembiak.
Nya alai iya ngelalau bala pesereta ngetanka semengat lumba ti tinggi rambau atur pekit nya.
Acara Rocket Cup Football Tournament diatur Pampang DAP Mambong.
Ari bantu sida ti melanja, pekit nya nyediaka perais mata duit sepenyampau RM1,600, trofi enggau midul ngagai tim menggi gelar champion.
Seraya tim ti menang penuduk kedua enggau ketiga bela deka nerima perais mata duit sepenyampau RM1,000 enggau RM600 disempulang trofi enggau midul.
Kelimpah ari nya, tim ti bulih penuduk keempat mega deka nerima perais mata duit sepenyampau RM200.