KPDNHEP enda ngeletak siti rega ke sebaka ba rega barang di nengeri tu laban nitihka zon
SIBU: Opis Menteri Dagang Dalam Nengeri enggau Pekara Bebeli Barang (KPDNHEP) sigi enda ngeletak siti rega ke sebaka ba rega barang di nengeri tu.
Sapit opis menteri nya, Chong Chieng Jen madah, nyema rega barang disebelaka tang ba nengeri tu rega barang enda sebaka nitihka zon.
“Taja kitai bisi rega standard ke udah diletak tang di nengeri Sarawak rega barang enda sebaka nitihka 34 bengkah zon ditu,” pia ku iya madah maya aum media ditu, kemari.
Dulu agi ari tu iya betuaika randau begulai enggau Gerempung Kedai Kopi enggau Restoren Sibu ditu.
Ambika banding khu Chong, rega standard barang pemakai maya hari besai baka Taun Baru Cina, Hari Raya tauka Gawai Dayak enda sebaka rega ba 34 zon tu.
Bekaul enggau randaunya, Kaban Parlimen Stampin nya madahka piak opis menteri iya nemu puku dikena be- jalaika dagang diatu tinggi.
Ketegal nya ku iya, rega barang tauka ai irup enda sebaka ba kedai siti-siti.
“Ari randau begulai enggau gerempung kedai kupi kitai nemu bisi kedai ngeletak rega ai irup enda sebaka lalu bisi nya kelalu mar.
“Kitai beterima kasih ngagai gerempung tu laban sida meri penemu ke chukup manah,” ku iya madah baru.
Nambahka nya, ku Chong, bisi mega penemu ti deka ngeletak rega ai irup tang taja pia piak sida deka beratika dulu pekara nya.
“Kami nangi rega ke enda sebaka tau bendar nanting belanja ruang bilik.
“Aku ngarapka sida ke beempu kedai kupi bela berundingka pekara tu lebih agi belanja ke ditapi raban B40.
“Tu mega seririh enggau kitai ti udah ngemaduka GST ti deka ngelempungka agi tating belanja rayat,” ku iya madah.
Opis Mentteri iya mega ku iya deka ngiga penerang rega barang di nengeri tu dalam kandang tiga minggu ti deka datai laban sida ukai semina bekaul enggau kedai kupi tang mega kedai tauka dagang bukai.
“Kitai ngemeratka pekara orang dagang tu beambi ulih ari untung ti kelalu besai ketegal rega barang ti enda sebaka rega,” pia ku iya madah.
Chong bela beterima kasih ngagai gerempung ti datai ba randau nya lalu madahka randau nya besai guna ba opis menteri iya.
Sama bela datai maya tu iya nya Kaban Kunsil Nengeri Pelawan David Wong, Direkter KPDNHEP Sarawak Stanley Tan, sapit iya Md Nawawi Abdul Rahman, Ketuai KPDNHEP Sibu Roslee Maslie enggau Chairman Gerempung Kedai Kopi enggau Restoren Sibu Tong Ing Kok. BINTULU: Tiga iku indu peranak menua luar enggau siku indu peranak menua tu beumur antara 20 ngagai 25 taun, ditan seraban polis ari Indu Opis Polis Pelilih (IPD) Bintulu, ketegal penyalah nyundal, lebuh pengawa datai ngenyit ngagai sebuah hotel ba Tanjung Batu, urung pukul 8 malam, Hari Lima tu tadi.
Ketuai Polis Pelilih Bintulu, Superintenden Zulkipli Suhaili, ba sebengkah penerang berita kemari madah, semua indu nya bisi dalam sekeda bilik hotel sebedau penatai ngenyit raban polis.
“Asil ari pengawa nya, kitai tetemuka empat iti telefon binching, 14 iti kondom, krim peransang seks enggau duit penyampau RM 4083, dipelaba asil ari pengawa nyempit,” ku iya nerang.
Bela dirampas ku iya, tiga iti passport diempu tiga indu peranak menua luar.
Nitih ku Zulkipli, asil ari pansik dipejalai ngagai kesemua sida disangka tetemuka modus operandi ti dikena ‘freelance’, bejalaika pengawa beraban kenyau ari seminggu ke udah, bekenaka aplikasyen wechat dikena ‘bedagang’.
“Pengudah setuju, pemeli deka ngelawa bilik hotel nya, lalu meri bayar RM230 ungkup 45 minit servis seks,” ku iya.
Ku iya nerang, lebuh sida datai ngenyit kita, siku ari indu peranak menua luar terejun ari ringkat satu, begunan hotel nya nguji ngelarika diri, tang mujur ditan raban polis.
Indu nya ku iya, udah dianjung berubat ngagai Unit emejensi Sepital Bintulu, laban bisi bakal.
Kes tu ku iya deka dipansik di baruh Seksyen 372B Kanun Keseksaan, laban bedagangka tubuh diri, ke alai kesemua sida deka ditinggang ukum jil enda lebih ari setaun, tauka ukum, tauka kededua sekali, enti dituku salah.
Tiga indu peranak menua luar nya mega dipansik di baruh Seksyen 39(b) Peraturan-Peraturan Imigresen 1963 laban salah guna pas pejalai nemuai rama ke alai tau ditinggang ukum enda lebih ari RM1,000 tauka jil enda lebih ari 6 bulan tauka kededua ukum, enti dituku salah.
Berebak enggau nya, Zulkipli madahka raban polis deka seruran matau sereta mansik kes nyempit di bagi menua nya, nentuka Bintulu punas ari ulah ti enda menuku sereta bedagangka tubuh diri.