Bank dikearap meri pemendar ngagai pengari ngambi BSHR
MIRI: Institusyen bank patut lunggar agi ngagai penerima Bantu Nupi Pengidup Rayat (BSHR) ke diau ba kandang menua pesisir ti enda ulih ngambi duit bantu ketegal sakit tuai tauka enda dapat mindah, ngemendarka pengari sida ngambi bantu nya.
Kaban Kunsil Nengeri (ADUN) Telang Usan Dennis Ngau madah, pengudah dikemendar ‘Inland Revenue Department’ (IRD) disempulang dokumen enggau surat ti nyukung pengari ulih ngambi duit bantu ngarika apai tauka indai sida, bank patut nyuaka bantu nya ngagai orang ti patut lalu nyeliahka pekara ti tau nating.
“Berat amat tating ditapi peranak menua pesisir enti sema sida pulai enggau mansang baru ari genturung pendiau jauh di entigis beambika dokumen bekaul baka ti dipinta bank laban bisi sekeda ari sida nadai pelajar lalu enda nemu sereta bisi mega sida nadai belanja dikena mayar tambang pulaika rumah,” ku Dennis madah ngagai The Borneo Post kemari.
Nitih ku Dennis, kena Hari Lima tu tadi, ambika chunto, iya mantu siti kes ke alai siku bansa Penan, Ayup Bong datai ari Long Belok Ulu Baram, ke alai indai iya mati tubuh sepiak lalu IRD udah ngemendarka iya ngambi duit bantu indai iya tang enda mujur pengudah bank begunaka surat ari Ketuai Kampung dikena ngenukuka iya datai ari menua nya.
Iya nyemetak madahka Ayup kala datai ngelawa iya dalam bulan March nyin tadi nerang indai iya mati tubuh sepiak lalu enda dapat mindah, nya kebuah iya (Dennis) mantu mutarka dokumen bekaul baka tingki enggau surat pengada lalu nyua ngagai IRD ngambi atur patut dipejalai.
Nya alai, Hari Lima tu tadi, Ayup enggau iya empu bela bisi ba bank ngambi bantu duit indai Ayup tang bank begunaka surat ari Ketua Kampung dikena ngenukuka iya datai ari genturung pendiau nya.
Dennis ti nyempulang Ayup ba bank madah, uji berunding, siku bansa Penan, Ayup Bong, datai ari Long Belok ari Sungai Apoh, lima jam pejalai ngena 4WD nengah jalai batang, nurun ke Miri lalu nikal baru ngagai menua ngambi surat nya.
“Aku semina deka madah tebal agi kes tu iya nya peranak ari menua ulu lalu pekara ti suah agi mansa runding aku ngelama tu sekalika apai tauka indai sida kelalu tuai nurun ke pasar tang sistem ba bank begunaka penerima empu datai laban chelak jari sida,” ku iya.
Nitih ku Dennis, enti IRD udah ngemendarka pengari ngambi bantu duit ngarika penerima, nama kebuah bank patut minta surat sokongan ti tau ngenusah peeranak menua pesisir nikal pulai ngagai menua sida ti begunaka belanja pengangkut mulaika diri ngagai Miri baru.
Ba lansa bukai ku iya, bisi sekeda peranak menua pesisir pabu penemu lebuh sida minta bantu masukka nama pengari sida.
“Uji berunding enti sida datai kitu, lalu nikal pulai ngagai menua ngulihka sain ti begunaka belanja besai enggau timpuh,” ku iya nandu.
Ngelansa pekara bekaul, ADUN Telang Usan madahka dua hari udah nya mega iya bisi nerima kangau ke sama, pengari enda ulih ngambi bantu laban nama pengari nadai dalam sistem.
Ku iya, baka ni chara perintah ulih mantu peranak menua pesisir nyeliahka pekara ti enda patut nating sida enti sema bank enda ngelunggarka atur sereta ulih nekul mayuh kes baka tu sereta mayuh sida ti mai voucher BSHR lalu ngandalka diri bulih duit tang asa.
Bisi sekeda sida nyangka nadai duit dikena mayar tambang, ku iya nambah.