Projek ngaga Jalai Besai Pan Borneo patut dikemerat Perintah PH dikearap anang ngukum rayat Sarawak nengah chara laun nembuka projek nya semina ketegal pekara politik
KUCHING: Kaban Parlimen Hulu Rajang Datuk Wilson Ugak Kumbong minta Menteri Kereja Raya ke baru, di baruh pegai Pakatan Harapan (PH) meri pemerat ngagai projek Jalai Besai Pan Borneo.
“Jalai besai di Sarawak iya nya Jalai Besai Pan Borneo, ke nyambung Sematan ba Sarawak enggau Tawau ba Sabah deka nyadi ‘ game changer’ ba pengawa pemansang sereta mega pengerembai ekonomi nengeri. Tu mega juluk perintah ke sebedau tu ( Barisan Nasional) deka nentuka Sarawak sebela enggau beberapa nengeri bukai di Semenanjung Malaysia,” ku iya lebuh dikerandau ditu, kena malam Hari Minggu tu tadi.
Ugak mega madah iya udah mantaika pekara tu ba Parlimen kena 24 Julai, sereta ngarapka perintah Pakatan Harapan deka nampung projek lalu enda ngukum peranak Sarawak nengah ulah ngelaunka kereja ngemansang semina ketegal politik.
“Tu nyata, projek deka meri penguntung ngagai rayat kelebih agi sida ke diau ba kandang menua pesisir. Sida tu mega peranak Malaysia, manah amat enti Pakatan Harapan ulih jampat nembuka projek ari maya ke timpuh,” ku iya.
Ugak ari PRS mega ngarapka manifesto pengawa bepilih tauka semaya Pakatan Harapan deka dikeamat lalu ukai semina nemu besemaya aja.
Ku iya, kandang menua Hulu Rajang beguna amat sambung jalai alun ti meruan.
Iya kala nangkan BN ke sebedau tu ngambi ngemanahka sekeda jalai di baruh program Opis Menteri Pemansang Menua Pesisir enggau Kandang Menua, baka 16 KM jalai nyambung Rumah Juntan enggau Jalai Melekun Nanga Sut, 9.5 KM jalai nuju Palan Pengentap Pendiau Tengulang Fasa 6 enggau 17 KM jalai ke Mentaloon Fasa 5 di Kapit.
Ku Ugak, iya mega deka minta ngaga jalai sepanjai 73 KM ke nyambung Nanga Nujum enggau Nanga Gaat lalu nuju Rumah Tenku Sungai Gaat.
Ku iya, iya sedia nyempulang bala pengari Pakatan Harapan ngabas kediri empu gaya jalai di menua tu.
Ugak mega dekaka jalai Bakun ti belubang, ngambika ditampal enggau naka penyampat.
“Sarawak bisi juluk deka nyadi nengeri mansang manggai ba taun 2030. Nya kebuah Sarawak begunaka agih belanja besai ungkup pemansang. Perintah besai udah ngambi minyak enggau gis berega bebilion ringgit ari Sarawak. Ba penemu aku, kitai diatu patut minta RM153 bilion ari perintah besai dikena Sarawak nyapai status nengeri mansang,” ku iya.
Jalai besai di Sarawak iya nya Jalai Besai Pan Borneo, ke nyambung Sematan ba Sarawak enggau Tawau ba Sabah deka nyadi ‘game changer’ba pengawa pemansang sereta mega pengerembai ekonomi nengeri. Tu mega juluk perintah ke sebedau tu (Barisan Nasional) deka nentuka Sarawak sebela enggau beberapa nengeri bukai di Semenanjung Malaysia. Datuk Wilson Ugak Kumbong Kaban Parlimen Hulu Rajang