Kontinjen Kuching champion ba ‘Special Olympic State Games 2018’

KOTA SAMARAHAN: Kontinjen Kuching bulih gelar champion ba ‘Special Olympic State Games 2018’ ke diatur di Stadium Unimas ditu, kemari.

Perais disua Menteri Pengintu Pengelantang, Komuniti, Orang Indu, Ruang Bilik enggau Pemansang Anak Mit Dato Sri Fatimah Abdullah.

Lumba ke diatur Chapter Olimpik Kuching nya dipasuk kontinjen ari Kuching, Sibu, Bintulu enggau Miri.

Fatimah ba jaku nutup lumba nya madah dekaka Special Olympic State Games seruran diatur.

“Lumba tu meri awak ngagai bala nembiak kitai, iya nya nembiak ‘ special’ ngasaika pengelantang ba pengidup.

“Nengah lumba enggau main tu, sida diberi awak nguji bengkah main ke udah ditusun.

“Enti sida udah nguji lumba tauka main, nya siti pemujur ungkup sida,’ ku Fatimah.

Ba pengawa kemari, Fatimah bisi ngemata atur nyuaka menira Special Olympic State Games ngagai Chapter Sibu ti deka ngatur lumba ke sama ba taun 2020.

Iya ke mega presiden Chapter Special Olimpik Sarawak ngelalau ba taun 2020, lumba enggau main tu ulih diatur enggau manah baka ke udah diatur di Unimas.

“Kitai keran nentuka lumba enggau main tu nyendia perengkaguna ke manah ngagai atlit ke bepekit.

“Unimas nengah saup raban volunteer udah ngemujur lumba enggau main taun tu,’ku iya.

Bela datai Chairperson Kuching Chapter Datin Dayang Mariani enggau Sapit Mandal Canselor Unimas Prof. Dr. wan Hashim.