Iya besemaya deka bejalaika pengawa enggau pemadu manah ungkup rayat sitak nya

KUCHING: Kaban Parlimen ( MP) Puncak Borneo Willie Mongin madah naka ulih mantu rayat nyengkaum gempung ukai dikuasa perintah (NGO) ba sitak nya ngulihka bantu ti diguna.

Iya madahka diri udah besemaya deka bejalaika pangku pengawa enggau pemadu manah ungkup rayat ti diarika iya.

“Aku deka mantu sida ti tusah, sekalika sida tu orang ngatika diri tauka serakup. Kita mega tau nerima bantu ari ejensi perintah bekaul dikena ngemujurka sebarang program.

“Aku mega deka bejalaika pangku pengawa memanah ungkup peranak ba sitak Puncak Borneo,” ku iya rambau pengawa nyuaka geran terus (outright grant) ngagai 14 gempung nyengkaum Komiti Pemansang enggau Pengelikun Genturung Pendiau (JKKK) ba Palan Servis Rayat Puncak Borneo semak ditu, kemari.

Iya ngelalau bala penerima geran ngena memanah ungkup ngemujurka aktiviti sereta pemansang genturung pendiau sida empu.

Aku deka mantu sida ti tusah, sekalika sida tu orang ngatika diri tauka serakup. Kita mega tau nerima bantu ari ejensi perintah bekaul dikena ngemujurka sebarang program. Willie Mongin Kaban Parlimen Puncak Borneo

Wille mega minta peranak ba sitak nya meri kerejasama ngambika pemansang ti dilangkar ulih dipejalai enggau lanchar sereta ngemai pemaik.

Ba lansa sama, iya madahka taun tu nadai mayuh geran ulih diagih laban perintah besai semina ngagihka RM500,000 ungkup tetiap Parlimen.

“Taun baru aku deka nerima mayuh agi geran ngambika diagih ngagai sitak menua dipegai aku pengudah tetiap MP deka diagih RM1 juta,” ku iya.

Nangkan nya ku iya, peranak ti begunaka belanja nganjung peminta ngagai iya nyengkaum minta belanja dikena berubat enggau bantu belanja nampung pelajar.

Ku iya, di baruh bantu perubat sereta belanja nampung pelajar, RM500 diagih lalu deka diberi sekali aja.

Pia mega ku iya, sida ti begunaka bantu kerusi roda, peminta tau dianjung terus ngagai Opis Servis Rayat Puncak Borneo.

WILLIE