Raban Indu PRS patut regas ngaul diri ba pengawa rama

KAPIT: Ketuai Indu Parti Rakyat Sarawak ( PRS), Dato Seri Doris Brodie, ti nyadi Sekretari Politik Kepala Menteri Sarawak, ngansak bala kaban sida ngubah runding dikena nangkup pengandal ari parti sereta bala komuniti.

“Ba pengidup kemaya hari, kitai patut ngubah runding diri ngambika chakah sereta kreatif agi. Kitai patut ngubah runding ngambika seruran relevan enggau ubah pengidup moden dikena nangkup pengandal ari parti sereta bala komuniti kitai ditu,” ku iya.

“Raban Indu PRS ukai semina chakah bejalaika pangku pengawa kitai dalam politik, tang kitai mega meseti regas ngaul diri dalam ekonomi-rama enggau aktiviti rekreasyen baka lumba ngambika kitai seruran nyaga pengerai tubuh enggau runding.

“Raban Indu PRS endang patut chakah ngaul diri ba pengawa rama, disikap enggau pengerai batang tubuh sereta runding, pengawa kitai deka meruan agi,” ku Doris lebuh bejaku ba pengawa bejadika Pekit Trofi Futsal Indu PRS diatur ba Stadium Bletih ditu, ujung minggu tu tadi.

Ku iya, pekit keterubah udah diatur ba Sri Aman dalam taun siti nyin tadi. Taun tu, gintir Raban Indu PRS Pelagus enggau Baleh begulai ngatur pekit.

Taun nyin tadi bisi 16 tim ti datai ari Lundu ngagai Lawas, sekayu nengeri enggau bepekit.

“Ba politik, kitai betemu tiga taun sekali maya Aum Besai Tiga Taun Sekali. Nengah pekit futsal tu, diatur ninting taun sereta nitihka gintir bagi menua ti bebida ngatur pekit, kitai ulih betemu setaun sekali.

“Tu nyediaka pelasar ngagai raban indu ari pampang enggau bagi menua bebida datai begelumu sereta begulai. Nengah lumba baka pekit futsal ulih nempa disiplin enggau kereja dalam siti tim sereta pemanah kaul begulai enggau pangan diri,” ku Dorris nambah.

Kaban Kunsil Nengeri (ADUN) Pelagus Wilson Nyabong Ijang dipebasa bejadika pekit nya.

Iya meri tabi puji ngagai Raban Indu PRS udah be- jalaika inisiatif ngatur pekit futsal.

Ku iya, menang tauka alah dalam pekit udah adat kitai bemain. Pekara ti beguna amat, kereja dalam siti tim, kerejasama, disiplin atlit sereta kaul bebakih.

Sekretari Politik Kepala Menteri Sarawak Nicholas Jantai Kudi, Ketuai Kunsil Opis Pelilih Menua Kapit Philimon Nuing, ex-Sekretari Politik Umis Tujoh, bala kaban exco Indu PRS Sarawak, bala pematih tim, menijar enggau pemain antara sida ke bisi datai rambau atur pengawa nya.