Pengerindu ngaga kereban dikena nganta ngerembai maju nengah chara ‘online’
KUCHING: P r i s c i l l a Michael berasai gaga ati ngaga kereban dikena ngelagu buk enggau barang nganta ngena manik ti ditusuk ngena ubong sereta gaga nyadi tengak tauka kepit buk.
Tang nadai kala nyangka pengawa rindu dikereja maya lepa mansang ngerembai nyadi dagang.
“Aku beratika beberapa pengias buk ti digaga aku lalu berunding nyual nya nengah online. Nya aku ngambi beberapa gambar lalu mantaika nya nengah online.
“Pekara udah nya ti ditemu aku, aku nerima tanya pasal pengias buk lalu enda lama udah nya, aku berengkah bisi nerima sida ti meli,” ku iya ke ngenang dagang ti dipun dalam taun 2013.
Pengudah dagang online iya berengkah ngerembai, Priscilla udah nya nemu penguntung iya jauh ari gaji RM1,200 ti diterima iya ari bekereja ba palan mulaika pemanah ulah komuniti ditu.
Ari nya, iya mutuska diri badu kereja dalam bulan November 2015 ngambika ulih fokus ngagai dagang iya, P. M. Y Collection, ngatur lalu udah nya ngerejista ngambi lisin.
“Aku datai ari ruang bilik kurang benasit lalu tu nyadika peransang aku ngangkatka pemanah tikas idup diri,” ku iya seraya ngaku keterubah iya endang mar laban kurang puku lalu iya nadai sebarang penemu bejalaika dagang.
“Tang aku netapka diri deka ngasuh dagang mujur, nya kebuah aku ngerejista diri ngulu kus ti engkeman dikena nyaup ngemanahka agi dagang aku.
Beumur 35 taun ari Kampung Taee, Serian madah, diatu tebal agi barang dikena nganta, ditengkebang ari gaya langkar enggau motif etnik Sarawak.
Kelimpah ari tengak, koleksyen mega nyengkaum gelang, gelang kaki, antin sereta mega kereban dikena nganta bukai ti setipak enggau pekayan asal.
Diatu, Priscilla ngatur pengawa ba P.M.Y Collection begulai enggau laki iya lalu pengawa rindu dikereja maya lepa nyadi dagang, udah tampak rita, iya ukai semina nerima pinta ari serata Nengeri Sarawak aja tang kereban dikena nganta mega dikena raban dipebasa nyengkaum Tuai Megai Menua (TYT) Tun Pehin Sri Abdul Taib Mahmud enggau bini iya Toh Puan Ragad Kurdi Taib, Kepala Menteri Datuk Patinggi Abang Johari Tun Openg enggau Sapit Kepala Menteri Datuk Amar Douglas Uggah Embas.
Kelimpah ari bedagang, iya mega bisi ngaul diri nyadi pematih ngagai ejensi perintah kelebih agi kaul bekaul enggau pengawa dagang.
Priscilla mega mujur nyapai beberapa pekara dijapai ungkup diri empu lebuh iya meri servis nyadi pesereta renggat kepenudi ngarika nengeri ba Pekit Numbuhka Pelin Dagang ke diatur beserimbai enggau Kompeni Suruhanjaya Malaysia (SSM) Karnival Kaul Dagang ( ONE) di Kuala Lumpur sereta mega nyadi siku ari pesereta ari Sarawak ba Road to INSKEN 500 ti diatur Intitut Dagang Menua (INSKEN) taun nyin tadi.
Apin lama ke udah, iya mega dipilih ungkup anugerah Amanah Ikhtiar Malaysia ( AIM) ‘ Anugerah Usahawan Sahabat’ sereta mega pesereta renggat ke penudi ungkup SSM Inspirasiku Project.