Estonia ulih mantu nyendiaka input ba sentang chara nempa sekula ke diintu manah sereta ba pekara analitik
KUCHING: Sarawak nganti pengelandik ari Estonia ba atur numbuhka Palan Sains ditu.
Pekara tu dipansut Menteri Pelajar, Sains enggau Pansik Teknologi Dato Sri Michael Manyin Jawong lebuh nerima penemuai basa Konsul Estonia di Malaysia, Kolonel (rtd) Datuk Harbans Singh kemari.
Manyin mega madah iya baru mulaika diri ari penemuai kereja ke alai iya ngemata sekeda palan sains ke pemadu manah dalam kandang menua tu, iya nya di Pulau Pinang, Kuala Lumpur enggau Singapore.
“Laban Estonia diatu nyadi menua ke pemadu mansang ba pekara digital di Eropah, Manyin madah Sarawak ngarap menua nya ulih mantu numbuhka Palan Sains Sarawak.”
Bela nerima penemuai basa Singh, Sekretari Mendam Opis Menteri Pelajar, Sains enggau Pansik Teknologi Datu Sudarsono Osman, Ketuai Saintis enggau Ketuai Penyanding Penemu Pekara Digital Perintah Sarawak Prof. Jugdutt (Jack) Singh enggau pemesai ari Opis Pelajar Sarawak Graman Ringi.
Ngenang kaul ke sama, Manyin mega madah ngagai Singh ke alai Estonia ulih mantu Sarawak nyendiaka input ba sentang chara nempa sekula ke diintu enggau manah sereta ba pekara analitik.
Ku iya opis menteri udah minta Opis Pelajar Nengeri milih sekula ba tetiap pelilih menua ngambi tau ngaga bilik belajar tikas Abad ke-21.
Iya nambah, kededua opis menteri enggau opis pelajar meseti berandauka ungkus ungkup tuju nya ngambika perambu bajet ulih disedia.
Manyin mega nusuika sentang sejarah Sarawak ngagai Singh, lalu ngarap mayuh agi penerang ke bekaul enggau sejarah Sarawak ulih dipasuk ba silibus pelajar menua.
Laban Estonia diatu nyadi menua ke pemadu mansang ba pekara digital di Eropah, Manyin madah Sarawak ngarap menua nya ulih mantu numbuhka Palan Sains Sarawak. Dato Sri Michael Manyin Jawong Menteri Pelajar, Sains enggau Pansik Teknologi