Universiti udah bebendar nyaup perintah nempa modal mensia

KUCHING: Raban ngatur pengawa universiti bejalaika pengawa ti beguna amat nyaup transformasyen enggau nyaup perintah nempa modal mensia dikena mai menua mansang nuju penyulut.

Nyebut pekara tu, Sapit Canselor University Malaysia Sarawak (UNIMAS) Professor Datuk Dr Mohamad Kadim Suaidi belalauka pejalai universiti menua tu ti udah bebendar gawa sereta bala staf nyadi kereban ngangkatka universiti endur ke diatu.

“Universiti menua tu udah mansang lalu nyata ngayanka diri empu ba penuduk ti manah diatu. Ambika chunto, Universiti Malaya ba Penuduk 100 QS Universiti Dunya enggau Universiti Malaya, Universiti Putra Malaya, Universiti Kebangsaan Malaya, Universiti Sains Malaysia sereta Universiti Teknologi Mara ba Penuduk 50 QS Universiti Asia 2018,” ku Kadim.

Iya bejaku lebuh pengawa ngintu ‘ Local University Administrator Day’ ba Hotel Kuching Waterfront, ditu, Hari Satu tadi.

Kadim nyemetak madah penyakah ngatur pengawa universiti menua tu ari raban ngatur pengawa tinggi, pengelicha terus ngagai kerani, staf admin enggau pemantu makmal beguna amat dikena nentuka universiti ulih nyediaka pelajar ti menyana ngagai bala nembiak.

“Berebak enggau nya, atur pengawa universiti patut nentuka semua pekara ari bala nembiak, sekalika iya akademik, kurikulum, pengelantang, belanja enggau pekara bukai deka diintu memanah,” ku iya.

Iya mega ngansak universiti makap jeman Revolusyen Industri 4.0 ari ngaul bala pakar dalam bidang ti bekaul sereta meri perati ngagai inovasyen.

Pengawa nya diatur beserimbai enggau ‘ Local University Administrator Convention’ ke udah diatur berengkah ari 20 Ogos ti dipasuk 156 pesereta ari universiti menua tu enggau peribit ngambi bagi.

Antara program diatur sekumbang atur pengawa tiga hari berunggu iya nya ‘Scavenger Hunt’ ba semanjai Kuching, forum pelajar, randau betukar buah penemu, pekit poster enggau pengawa mandang.