Penguang muji inisiatif nya laban mandangka pengeransing perintah nentuka pengidup rayat menua pesisir seruran dikemanah
MIRI: Menteri Muda Kaunsil Kandang Menua Datu Dr Penguang Manggil madah sitak Marudi agi beratika perambu agih belanja khas perintah RM2 juta dilanggur dikena meli paung Musang King lalu enda melabaka sebarang bansa rian udah tu.
Iya mansutka jaku tu ba jaku ngelaluka inisiatif perintah nengeri melanja RM2 juta rega paung rian Musang King ungkup raban bumai ari empat sitak menua - Sibuti, Lambir, Piasau enggau Marudi- ba nengeri tu.
Opis Menteri Betanam Betupi Moden, Tanah Adat enggau Pemansang Kandang Menua ( MANRED) udah nyendiaka agih belanja khas RM2 juta ngagai sitak Sibuti, Lambir, Piasau enggau Marudi dikena meli paung rian Musang King.
“Kitai deka ngelala bagi pekebun ti bisi pengulih ba sitak N76 Marudi. Opis menteri deka numbuhka palan ngumpul ngambika meli semua rian dikeluarka per- anak menua tu nyengkaum Musang King,” ku iya lebuh dirandau, minta iya nerang.
Sapit Kepala Menteri enggau Menteri MANRED, Datuk Amar Douglas Uggah Embas ngemendarka inisiatif tu ba jaku iya rambau pengawa bejadi muka Mardi Gras Lambir renggat kedua, ditu hari Enam tu tadi.
Ku iya, inisiatif tu sebagi ari pengawa dipejalaika opis menteri dikena nentuka pengidup enggau penatai pemisi peranak menua pesisir seruran dikemanah.
Penguang meri terima kasih ngagai Uggah ungkup program tu, madahka tu deka nyaup ruang bilik ti dipilih ngulihka belanja tambah sereta nyungkak ekonomi menua pesisir.
Nitih ku Uggah, opis menteri deka ngagihka RM500,000 ngagai sitak parlimen Sibuti dikena meli paung rian Musang King lalu tu meda deka ditampung ngagai sitak Lambir, Piasau enggau Marudi.
Uggah, ti nyadi Sapit Kepala Menteri Saraweak, ngansak bala MP enggau ADUN ba empat sitak menua tu berandau enggau bala pengundi sida senentang mayuh bengkah aktiviti betanam betupi, nyengkaum nanam rian ba kandang menua sida.
Iya andal amat pekebun rian Musang King enggau produk sida deka bisi pemujur dudi hari, kelebih agi ba sukut penatai pemisi sida, laban bisi makit ungkup produk tu udah bisi dikelala.
Sarawak nempa sejarah taun nyin tadi enggau eksport 16 tan pes rian ngagai China, lalu bisi awak teulihka pemujur dudi hari ungkup produk ari rian ari nengeri tu.
Uggah mega bisi peragam manah ke alai Raja Buah nyadi chara dikena ngemunaska penyeranta sereta mutarka isu penatai pemisi enda sebaka antara komuniti mengeri enggau menua pesisir.
Nitih ku The Straits Times ba Singapore, rian Musang King diberita mansutka asil semilan kali lipat ari minyak sawit ba rega RM150,000 (S$50,605) sehektar dalam taun 2017.
Ari peminta rian majak nambah, bisi awak besai ngagai Malaysia nambahka makit iya pengudah China ngemendarka Malaysia eksport rian laban rian Malaysia jauh nyamai.
Laban pengawa nanam begunaka momentum, beberapa analisis meragam Raja Buah tu deka ngelih minyak sawit nyadi pengawa beranakka puku baru ba Malaysia maju ke mua.
Maybank Kim Eng madah ba ripot kena Hari Dua (22 May), pengawa nanam rian bisi pengulih mansutka belanja semilan kali lipat mayuh agi penatai pemisi dibida minyak sawit sehektar pemesai seraya mansutka asil Penatai Pemisi Sebedau Bungai enggau Chukai ( EBIT) ngelui ari 50 peratus, iya dipelaba tu nyangka ngasuk beberapa pekebun sawit ngalih ngagai utai tanam ba idar nanam baru udah nya beratika bisi kurang enggau ungkus tanah tinggi sereta gaji niki.
Kitai deka ngelala bagi pekebun ti bisi pengulih ba sitak N76 Marudi. Opis menteri deka numbuhka palan ngumpul ngambika meli semua rian dikeluarka peranak menua tu nyengkaum Musang King. Datu Dr Penguang Manggil Menteri Muda Kaunsil Kandang Menua