Nanta enggau Jamit bejalai ngabas sekeda rumah panjai seraya nyua bantu
KUCHING: Kelab Kuntau Akademi Serakup Dayak Iban Sarawak ( ASADIA) udah mujur ngelatih 10 iku kaban sida nyadi guro kuntau.
Sida mujur nembuka latih diri kena 5 Ogos tu tadi nengah latih intensif pengelama sebulan.
Ketuai ASADIA Mabong Unggang madah, guro kuntau tu endang nyadi serak ti deka nampung pengawa akademi ngelatih mayuh agi kaban kuntau.
“Aku ngarap sida ke udah dilatih nyadi guro kuntau tu ulih muka gelanggang kediri emu awakka mayuh agi komuniti Dayak lebih agi sida ke biak belajarka kuntau.
“Makin mayuh kelas tauka gelanggang kuntau dibuka, nyadi makain jampat seni kuntau ngerembai ba raban bansa kitai,” ku iya madah ngagai Utusan Borneo.
Tandu Mabong, naka tu ASADIA ngena servis guro Patrick Tuat ngelatih bala kaban sida.
Tang pengudah bisi 10 iku agi guro asil ajar Patrick empu, nyadi akademi tu diatu ulih mayuh agi kelas kuntau ba luar akademi.
“Kami ngelanggur deka muka kelas kuntau ba sekula- sekula primari enggau sekondari.
“Aku deka berundingka langgur penemu tu enggau kepala pengajar sereta prinsipal ba sekula-sekula ke bisi ati lalu nadai nangang kitai mungkal kelas kuntau tu dalam taun baru,” ku iya.
Berebak enggau nya, Mabong beterima kasih ngagai Peter Umak laban udah ngemendarka akademi ngena tanah sida ba Semaba enggau enda bebayar nyadi gelanggang kuntau.
Kelimpah belajar kuntau seni nyaga tubuh diri Iban, bala kaban kuntau tu mega belajarka tabuh kuntau tauka bemain perengka muzik kuntau ke udah berengkah minggu siti ke udah.
Bala pesereta kelas tabuh tu dilatih Kilau Debis iya nya siku orang ke endang landik siti ari seni main asal Iban nya. KAPIT: Kaban Parlimen (MP) Kapit Datuk Alexander Nanta Lingggi kandang tiga hari ke udah chukup kiruh ba atur program bejalai ngabas rayat ba sitak parlimen iya begulai enggau Kaban Kunsil Nengeri (ADUN) Bukit Goram Jefferson Jamit Unyat.
Sida sebuat bisi bejalai ngagai Rumah Roland Banggau, Sungai Tiasa, Ulu Yong ngabas taba rumah panjai ti baru tembu disungkur enggau sambung jalai 4km baru ngelawa rumah panjai nya.
Rambau Program Pemimpin Begulai Enggau Rayat ba Rumah Roland, Nanta udah ngemendarka agih belanja penyampau RM75,000 dikena nyeleti 15 pintu bilik Rumah Roland.
Nambahka nya, Jamit mega bisi ngagihka belanja penyampau RM8,000 ungkup Biro Indu ari rumah panjai nya, dikena sida bejalaika aktiviti sereta bebelika perengka ba dapur.
Pengudah nya sida bejalai nemuai ngagai 20 pintu bilik Rumah Janduk, Ulu Sungai Yong, ngabas sambung jalai baru pemanjai 4km ti baru tembu digaga di baruh agih belanja Transformasyen Menua Pesisir ( RTP) ari Jamit.
Entudi nya, pejalai nemuai ngagai 31 pintu bulik Ru- mah William Unchat enggau projek masang tile beungkus RM75,000 udah dikemendarka Nanta.
Rambau penemuai nya, Nanta mega ngena awak nya meri penerang gaya politik ba menua kandang diatu. Iya mega bekunsika penerang pasal pengawa rejista Gabungan Parti Sarawak ( GPS) sereta pangku pengawa 19 Kaban Parlimen ari Sarawak ti datai ari GPS.
Nanta enggau Jamit mega bela ngulu misa Minggu ba Gerija Methodist Iban Pasar Kapit kena pagi Hari Minggu.
Pengudah ngulu misa Minggu, Nanta ngenataika berita manah ngagai bala dia ke alai chek penyampau RM3 juta ari Perintah Nengeri ti udah dikemendarka Kepala Menteri Sarawak, Datuk Patinggi Abang Johari rambau penemu iya ngagai Kapit dalam taun 2017, udah diterima iya empu (Nanta) ti ngarika Gerija Methodist Iban Pasar Kapit.
Bala ketuai enggau komiti gerija berasai lantang nerima berita manah nya laban sida udah ngiga belanja dikena ngaga gerija baru ungkup Pasar Kapit.
Ba kesemua pengawa iya nemuai ngabas sereta berandau enggau rayat, Nanta mantaika temegah sereta meri terima kasih ngagai semua sida ti udah puh nganti sereta mereti nama kebuah iya jarang bisi ba Kapit enggau Song, ketegal kiruh ngulu aum parlimen ti lebih sebulan sereta mega kiruh ngatur pengawa rejista GPS.