Sri Aman dipilih endur ngatur Hari Pengada DYMM Agong Ke-15 kena 8 - 9 September
KUCHING: Bagi menua Sri Aman dipilih endur ngatur Hari Pengada, Hari Keputeraan Rasmi Ke Bawah Duli Yang Maha Mulia Seri Paduka Baginda Yang Di- Pertuan Agong Ke- 15 Renggat Nengeri Sarawak, kena 8 ngagai 9 September tu ila.
Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit, Dato Sri Fatimah Abdullah ke nyadi menteri megai tanggungpengawa ngatur pengerami nya madahka mayuh program diatur ti nyengkaum mensia mayuh.
Pengawa nya ila ku iya deka berengkah enggau besembiang terima kasih kelimpah ari bisi aktiviti bukai ti diatur ba masjid baka sembiang Fardhu Maghrib enggau Isya, macha Surah Yassin enggau ZikirMarhaban.
“Kena 8 September ba Mas- jid Bandar Sri Aman pukul 6.30 lemai, ti sama digulu Yang Di-Pertua Negeri Tun Pehin Sri Abdul Taib Mahmud enggau Toh Puan Kurdi Taib sereta Kepala Menteri Datuk patinggi Abang Johari Tun Openg enggau Datin Patinggi Datuk Juma’ani Tun Tuanku Bujang. Dipelaba lebih 1,000 orang datai enggau besembiang tu.
“Pagi 9 September ti deka diatur dikena ngenang tauka nyambut pengerami nya diatur resepsi Jamuan Teh ( High Tea) ba Hotel Seri Simanggang. Kepala Menteri sereta menteri kabinet enggau laki tauka bini dikanggau datai ngulu resepsi tu,” ku iya.
Fatimah mansutka pekara nya dalam aum pengarang berita Ngintu Hari Pengada Hari Keputeraan Rasmi Ke Bawah duli Yang Maha Mulia Seri Paduka Baginda Yang Di-Pertuan Agong XV Renggat Nengeri Sarawak, ti diatur ba Ringkat 2 Wisma Bapa Malaysia ditu, lemai kemari.
Kelimpah ari nya bisi tiga menteri ke mantu Fatimah ngatur pengerami nya baka Menteri Muda Pengelantang Raban Bansa Datuk Francis Harden Hollis; Menteri Muda Industri enggau Pemeranak Puku, Malcom Mussen Lamoh enggau Menteri Muda Nembiak enggau Lumba enggau Main, Datuk Snowdan Lawan.
Nyerumba pengerami tu Tun Taib mega diberi basa nyuaka hamper sereta pemeri mata duit ngagai klien Opis Pengintu Pengelantang Pendiau (JKM).
Pengudah tembu Jamuan Teh (High Tea), Tun Taib deka bejadika pengawa pemandang ke diberi nama Raja Kita, ti diatur Opis Pemadah Sarawak ba Lobi Hotel Seri Simanggang.
Pengawa pemandang nya dibuka ngagai mensia mayuh ari pukul 2 lemai kena 9 September sereta ari pukul 9 pagi ke atas kena 10 ngagai 11 September.
“Kitai ngangauka mensia mayuh datai ngagai pemandang ke diatur tu, laban kitai deka meri pemanah enggau penguntung ari pengawa pemandang tu.
“Kitai ngangau sepemayuh ke ulih nyengkaum Gerempung Ukai Dikuasa Perintah ( NGO), nembiak sekula sereta ke bukai ulih datai ngagai pengawa pemandang tu ngambika bulih penerang pasal Raja Kita,” ku iya seraya madah nya entara pekara diatur maya nya ila.
Sama bisi datai ba aum pengarang berita nya kemari, Harden, Snowdan enggau Direktor Protokol enggau Pennusun Program Negeri Azlan Ali Badri sereta Residen Sri Aman, Indit Bangai.