Sepuluh rumah panjai di Tatau udah bisi elekterik 24 jam
KUCHING: Nyauka 1,200 peranak ari 204 ruang bilik ba sepuluh buah rumah panjai di Tatau, Bintulu diatu ngasaika perengkaguna bekal kuasa karan 24 jam di baruh Skim Kuasa Karan Alternatif Menua Pesisir Sarawak (SARES).
Nitih ku penerang berita kemari, rumah panjai tu iya nya Rumah Malo, Rumah Sekaya, Rumah Samun, Rumah Kanyan, Rumah Nyuan, Rumah Lasok, Rumah Billy, Rumah Layang, Rumah Sylvester Bunsu enggau Rumah Sujan.
Programbepelasarkakomuniti, SARES nya dipejalai di baruh Opis Menteri Bekal Ai enggau Elekterik Menua Pesisir enggau Sarawak Energy Berhad (SEB) begulai enggau sepuluh buah rumah panjai nya udah bekerejasama ngaga sistem solar ba genturung pendiau sida empu berindik ari pemar ditapi ba pengawa nyambung ari grid.
Pengawa nyua udah diatur ba Opis Pelilih Tatau kemari kelai projek tembu enggau pengawa ngelekatka lampu rumah ba sepuluh buah genturung pendiau nya.
Menteri Muda Elekterik Menua Pesisir, Abdul Rahman Junaidi ke mega Kaban Kunsil Nengeri ( ADUN) Pantai Damai udah bejadika pengawa nya begulai enggau Menteri Muda ba Opis Kepala Menteri ( Undang- Undang enggau Adat Bumiputera) ke mega ADUN Kakus.
Sama bisi datai Direktor Bekal Kuasa Karan Opis Menteri Bekal Ai enggau Elekterik Menua Pesisir, Syed Fauzi Shahab sereta pengari ari ejensi bekaul enggau ket- uai raban bansa.
Ngarika SEB iya nya Menijar Kandang Menua Bintulu, Yong Hua.
Tuju program SARES ke beungkus RM500 juta dikena mai 8,700 semua ruang bilik nya mansang manggai ba taun 2020, ti ba kandang menua ulu nyengkaum Ulu Skrang, Katibas, Nanga Merit, Bukit Mabong, Tinjar, Long Bedian, Telang Usan, Bario, Julau, Tatau, Sungai Gaat, Sungai Pila enggau Medamit.
Tetiap projek nyengkaum pengawa ngaga sistem alternatif bediri kediri, ngena teknologi mikro hidro tauka solar.
Kenyau ari dilanchar dalam taun 2016, 2,600 ruang bilik ba 106 genturung pendiau sebedau tu ngena injin api diatu ngembuan perengkaguna ruang bilik sida baka lampu, televisyen, enggau ke bukai nengah SARES.
Ari baruh SARES, komuniti enda ibuh mayar karan tauka bepanggai ba minyak diesel.
“Kelimpah ari kerejasama komuniti nya empu, pemujur SARES engka ketegal penyakah enggau pengepuh semua bakih kunsi ti dikaul nyengkaum tim SARES kami.
“Kelimpah nentuka projek tu tembu sereta dipejalaika, sida nyendiaka sukung teknikal ti seruran bisi seraya nyendiaka latih ngagai bala komuniti menua ti jauh di menua ulu dikena nentuka sistem SARES dipajakka belama,” ku Ketuai Pemesai Eksekutif Kumpulan Tenaga Sarawak, Sharbini Suhaili.
SARES nya sebagi ari Besai Integrated Elekterik Luar Menua Pesisir ti udah dalam taun 2015 dikena mantu 30,000 ruang bilik di menua pesisir di nengeri tu, enggau juluk meransang Sarawak ngambika ulih mekal kuasa karan ngagai semua ruang bilik manggai ba taun 2025.