Penerang ari SWB madahka nadai paip pantis di Batu 7 Jalai Tunku Abdul Rahman

SIBU: Opis Ai Sibu (SWB) mantaika penerang madahka paip besai 450 mm M.S di Batu 7, Jalai Tunku Abdul Rahman ditu ti dipelabaka bisi pantis sebedau tu.

Penerang SWB madah, piak sida udah meresa palan nya lalu paip dipeda mengkang manah.

“Kitai enda ulih nemu paip bisi pantis enti enda ditumbak.

“Ai ke bisi dia datai ari seberai jalai tang ukai ari paip pantis,” pia ku iya madah, kemari.

Dulu agi ari nya, SWB mantaika penerang nengah Facebook madahka bisi penanggul ba bekal ari lalu sekeda endur deka ngasaika pekara nya berengkah ari pukul 1 kemari dikena meri awak ngemanahka paip pantis.

Piak sida mega ngerintai nama endur ti deka nadai bekal ai iya nya di Jalai Tunku Abdul Rahman ( jalai besai), Jalai Jade Villa, Jalai Rafflesia, Jalai Suntec, Rumah Juntan, Rumah Sebastian, Rumah Kampit, Lurung Tunku Abdul Rahman 42, Taman Primeview, ari Batu 13 Jalai Ulu Oya ke Jalai Sibintek, ari Jalai Kemuyang By Passs ke Jalai Durin Link ( nyengkaum sekeda endur di Jalai Taman Sunhill Road, Padang Bilun Sibu, Jalai Sibu Jaya) enggau Sungai Pak.

Dipelabaka urung 8,700 iku mensia mayuh ba endur tu.

Penerang ti dibantai tumu nya nerima macham penemu sereta bisi mega berasai nangi.

Taja pan baka nya, SWB lengkas ngadu baru laman Facebook dikena nerang ngagai mensia mayuh ti madahka paip nadai pantis di Batu 7, Jalai Tunku Abdul Rahman.

Ba rikod, bulan April taun tu, urung 7,000 iku mensia mayuh ditu ngasaika penanggul nadai ai ketegal paip pechah.