Tu berindik ari pemutus nentuka kategori nya ari Opis Pelajar begulai enggau JKR
SIBU: Tiga kategori ti dikena nentuka sekula ke udah luya ba Sarawak iya nya endang komprehensif, ke alai sekula patut diseleti enggau jampat dikelala ari chara profesional ngambi dikemanah.
Menteri Muda Pelajar enggau Pansik Teknologi Dr Annuar Rapaee, madah input ke profesional udah dipinta ari kededua raban Opis Pelajar enggau Opis Kereja Raya (JKR).
“Nya kebuah aku andal enggau pekara ti udah digaga ba pengawa klasifikasyen sekula ti luya ba Sarawak – udah dipejalai chara profesional nyadi input (klasifikasyen sekula ti luya) iya nya ukai semina ari Opis Pelajar Sarawak aja tang mega ari JKR.
“Tiga kategori klasifikasyen ti dikena kitai – ba aku, ke amat chukup manah ungkup kitai ngelala ni bagi sekula ti diberi pemerat (diseleti),” ku iya lebuh dirandau The Sunday Post bedau lama.
Dr Annuar, ti mega Menteri Muda Pengawa Berumah enggau Pengerai Mensia Mayuh madah bisi 395 sekula di baruh kategori satu sekula luya, 210 di baruh kategori dua enggau kategori tiga bisi 415 buah sekula luya.
Iya nimbal penerang dipansutka Sapit Menteri Pelajar Teo Nie Ching apin lama ke udah ke alai Opis Menteri Pelajar benung bejalaika atur pengawa beratika baru definisyen sekula ti luya serata menua.
Ku Teo, pengawa nya patut dipejalai ngambika semua ejensi di baruh ulih bekenaka definisyen ke sama.
“Iya patut digaga ngambika kitai ulih ngena kriteria ke sama dikena nentuka ni bagi projek ti patut diberi pemerat.
“Bisi sekeda kriteria patut diperunding nyengkaum endur sereta mega endur nirika buding enggau kuarters pengajar. Tu kriteria ti patut diperunding,” ku iya rambau saut tanya ba aum Dewan Rakyat apin lama ke udah.
Senentang pekara tu, ADUN Nangka madah, “Udah dibai ngagai aku ke alai Opis Menteri Pelajar udah nyebut definisyen sekula luya tu deka diserenih baru. Ba penemu aku, tu hak sida – sebarang definisyen ti deka dikena dudi hari.
“Tang meseti dikingat, pekara tu patut anang ngasuh penanggul betanguh ba sebarang pengawa ngagihka belanja tauka inisiatif dikena nyeleti enggau ngaga baru sekula ti luya ba Sarawak. Reti iya, (definisyen baru) patut enda nyadika dalih nangguh pengawa nyeleti enggau ngaga baru sekula luya laban sekula majak balat repuk,” ku iya.
Tambah mega ku iya, makin lama nganti, makin besai belanja dikena bebelika ramu berumah.
“Tang enti sema opis menteri deka nyerenih baru definisyen sekula luya – ke alai sekula ba Malaysia tauka menua tasik deka nyadi kelai penuduk ba pekara nya,” ku Dr Annuar nanya.
Nya kebuah aku andal enggau pekara ti udah digaga ba pengawa klasifikasyen sekula ti luya ba Sarawak – udah dipejalai chara profesional nyadi input (klasifikasyen sekula ti luya) iya nya ukai semina ari Opis Pelajar Sarawak aja tang mega ari JKR. Dr Annuar Rapaee Menteri Muda Pelajar enggau Pansik Teknologi