Aplikasyen iPeople dikena ngangkatmanah sistem bekaul servis mensia mayuh
SIBU: Langgur penemu ngemayuhka agi pengawa bekenaka aplikasyen ‘ telefon pintar’ iPeople ke semua kaunsil kandang mengeri di nengeri tu endang patut.
Menteri Muda Kaunsil Kandang Menua Datu Dr Penguang Manggil madahka pengawa bekenaka aplikasyen nya nyadi inisiatif ti dikemansangka Raban Kaunsil Kandang Menua ( PBT).
Ku iya, aplikasyen nya ditempa dikena ngangkatka pemanah sistem ngenatai enggau servis enggau mensia mayuh.
“Baka ti udah disebut aku ba media sebedau tu, PBT nyadi raban ngatur pengawa perintah ti ketiga pemadu semak enggau nya, nya kebuah sebarang chara ti tau dipejalai tauka enda ngayanka penyikar kesemua raban gawa perintah.
“Nya alai, udah nyadi tanggungpengawa PBT seruran ngangkatka pemanah sistem ngenatai sida dikena nangkup peminta komuniti moden,” ku iya lebuhka dirandau.
Iya mansutka jaku nya lebuh dipinta ngelansa pasal peminta Menteri Pengawa Berumah enggau Kaunsil Kandang Menua Datuk Dr Sim Kui Hian ngambi ngemayuhka agi pengawa bekenaka aplikasyen telefon pintar iPeople ngagai semua kaunsil kandang menua di nengeri tu.
Dr Sim nerang iya endang bisi ati enggau aplikasyen nya ti ngemuntangka mensia mayuh mantaika sebana, bebayarka pupu taun sereta servis di baruh PBT.
Ku iya, sistem sambung servis ti dikena diatu udah enda engekeman agi enggau pengerambai teknologi kemaya hari.
Kalimpah ari nya, nengah aplikasyen nya mega mensia mayuh ulih meri timbal enggau jampat, nerima penerang pemadu baru sereta ngatur pengawa nengah telefon sida empu.