Philip udah dituduh salah ketegal penyalah masung, munuh staf JPN
SIBU: Philip Uja udah dituduh di Kort Seksyen ditu ketegal penyalah masung enggau munuh siku pengereja pengawa Opis Pengerejister Menua (JPN), kemari.
Iya didawa nengah Seksyen 302 Kanun Keseksaan ketegal munuh enggau Seksyen 376 (4) kod ti sebaka laban masung niang.
Dua iti penyalah tu deka mai ukum mati.
Taja pan baka nya, ba dawa masung, iya tau ditinggang ukum jil 15 taun sereta enda ngelui 30 taun enggau disipat enda lebih ari 10 kali.
Maya bechara iya madahka diri enda salah ba mua akim Caroline Bee Majanil.
Nitihka fakta kes, Philip, 42 dipadahka masung niang sereta nejuka niang mati antara jam 8 malam kena 1 Ogos nyentuk 2.30 lemai kena 2 Ogos ba sebuah bilik di Jalai Tiong Hua.
Niang Nurnia Azalea Priscilla Edward ditemu bala bakih di rumah siwa niang pukul 2.30 lemai kena 2 Ogos tu tadi alai maya nya jari enggau kaki ditanchang.
Sida datai ke rumah nya sepengudah laki niang, 29, ke gawa nyadi staf di sebuah sekula ba Tatau minta saup ngiga bini iya ketegal ti enda ngangkatka telefon iya.
Pemutus pansik mega madahka niang mati ketegal bakal ba pala.
Keruntuk pala niang dipa- dahka bisi retak lalu dipelabaka dipalu kelimpah bela bisi bakal ba mua enggau rekung.
Niang enggau laki iya udah nirika rumah tangga setaun ke udah tang bedau bisi anak.
Akim Caroline netapka 2 Oktober bechara baru sepengudah Sapit Pendakwa Raya Mohammad Tajul Aariffin Musa minta dilanjarka ngena timpuh ke lama laban bekenaka ripot kimia enggau autopsi.