Pesta Kapit dilanggur deka diatur berengkah ari 21-30 September
KAPIT: Pesta Kapit, Program Pemandang Pengawa Dagang, ‘Karnival Kepenggunaan’ sereta ‘Anugerah Carta Sapa Juara V’ (ACSJ V) Kapit udah dilanggur deka diatur berengkah ari 21 nyentuk 30 September 2018 ba Padang Bilun Lama Kapit, Jalai Padang Bilun ditu.
Pesta Kapit diatur begulai Opis Residen Kapit di baruh ketuai Sapit Residen Kapit, Galong Luang, Opis Menteri Dagang Temuai, Seni, Main Asal, Nembiak enggau Lumba Nengeri (MTACYS), Menteri Dagang Dalam Menua, Koperasi enggau Orang Bebelika Barang (KPDNKK) Kapit, RTM Sarawak, Kaunsil Pelilih Kapit sereta Top Event Services Sdn Bhd.
Atur pengerami pengelama 10 hari berunggu nyengkaum Pengawa Mandang enggau Bejual, Panggau Rayat (21 September), ‘Kapit Fun Run’ (22 September), ‘Kapit Iron Man’ enggau ‘Ratu Kapit Fest’ (23 September), Pekit Ngajat Beraban (24 September), Pekit Ngelinsu Nembiak Mit, Interaktif Pengguna Bijak enggau Pekit Berapi Lauk Bepengerai (25 September), Pekit Beranyam Kreatif enggau Manik, Pekit Kapit Idol ( Renggat Saringan) kena 26 September, Renggat Kepenudi Pekit Kapit Idol (27 September), rehearsal Anugerah Carta Sapa Juara 2018 ( renggat saringan) diatur kena 28 September, Panggau Rayat diatur 29 September, Lumba Bot Injin Mit, Pekit Nyumpit enggau Pekit Ratu Kapit Fest Renggat Kepenudi deka diatur kena 30 September.
Galong Luang meri penerang ngagai pengarang berita pengudah ngetuaika aum komiti pengatur madahka antara tuju dikena nyediaka pelasar merandang raban bedagang ti bisi pengulih ngambi bagi ba pengawa dagang (bejalaika bangsal dikena mandang enggau bejualka asil dikena ngulihka belanja), kelebih agi meri peransang ngagai bansa Bumiputera ngaul diri ba pengawa dagang, sida ti keterubah bedagang.
Ku Galong, atur pengawa baru ti ditambah sekali tu iya nya bisi penyedar ba pekara pengerai. Kitai mega bisi ngatur Kapit Fun Run dikena meransang mensia mayuh ngambi bagi ba aktiviti luar nentuka sida seruran regas batang tubuh enggau runding.
Iya ngarapka ‘Pesta Kapit 2018 Showcase Keusahawanan Karnival Kepenggunaan Anugerah Carta Sapa Juara IV 2017’ taun tu ukai semina dikena berami aja, tang mega ngemai reti meri peransang ngagai peranak menua tu nyadi raban dagang ngambi ulih ngulihka penatai pemisi.
“Kesemua langgur penemu ngatur Pesta Kapit diatur nengah chara tu ti ngaul mayuh bengkah opis menteri taun tu ukai semina dikena mensia mayuh berami aja, tang kitai dekaka iya ngemai amyuh agi reti ari sukut ngembing enggau meri peransang ngagai mensia mayuh teulihka pengutung.
“Kitai ngemai kelala program dagang. KPDNKK deka ngajar mensia mayuh nyadi raban ti pintar runding dikena meransang sida bebelika barang enggau bekena bisi reti. Sida dipinta berundingka kualiti enggau rega barang ti dibeli,” ku iya madah nyemetak.
Pengerami diatur ba Padang Bilun Lama, endur besai nirika bangsal ungkup bedagangka gari, asil kraf jari enggau pemakai menua tu. Kapit tebilang enggau asil kraf jari, pua kumbu, manik, buah sereta mega pemakai asal.
“Pengerami tu nguji ngangkatka Kapit nyadi palan ditapatka temuai. Antara program dagang temuai iya nya lumba ai, Lumba Injin Sepit. Kapit pegari nama ba lumba ai, regatta mit iya nya Rakit Safari.
Raban Radio Television Malaysia ( RTM) ngatur program nguji nyidi sida ti bepenau. Bala artis diberi awak bepekit belagu enggau bepekitka penau diri. Muzik ukai semina nyadi pemerindang aja. Sida ti bisi penau ulih nyadi artis enggau pemuzik. Muzik tu mega industri.
Sida tu ulih idup meruan enti sida nempa pemujur ba bidang tu. Muzik iya nya industri besai. Muzik enggau lagu Iban chukup tebilang ba nengeri tu. Ukai semina didinga bansa Iban aja, tang mega komuniti bukai rinduka lagu Iban. Pengawa dagang mega nyengkaum penau, sida ulih idup, ku Galong nambah.
Pesta Kapit taun tu diatur besai agi. Pekara ti beguna amat ngaul mensia mayuh, raban diselinting, meransang sida bedagang. Dipun enggau dagang mit dikena ngulihka belanja.
“Nadai agi hari raban gra- duet muntang bulih kereja. Diatu, gaya ekonomi udah berubah. Awak mega mayuh. Ukai semina kereja aja tang mega dagang. Ambika chunto, graduet universiti, sida ukai semina ngiga kereja aja, tang ngepunka dagang diri empu.
“Nyata sekeda teulihka pemujur sereta maju. Sida ukai nyadi orang ti ngiha kereja tang lebuh sida ngepunka dagang mit diri, sida maju, bulih untung, sida nempa pengawa puang ngagai orang bukai.
“Pengudah teulihka pemujur, sida deka nyadi orang ti nempa pengawa puang ba kandang menua pesisir. Tu pengawa baru ngagai raban nembiak, kelebih agi ba kandang menua pesisir nyadi raban ti nempa pengawa puang,” ku Galong.
Sama bisi datai baum iya nya Pemesai Pelilih Song Jackline August, Pemesai Pengatur Pengawa Bidah Lujah, Tracy Nyipa, Nuwin Luang, Rolyn Terrance, Pemesai Bagi Iban RTM Miri Bana Jimbat, Menijar Top Event Edward Mut, Pemesai KPDNKK Kapit Idrus Nalim, Inspektor Mohd Firdaus Mahadi sereta bala bukai. SIBU: Sepenyampau 260 kes nunu babas antara 3 Ogos ngagai 20 Ogos udah nganguska pemesai 790.131 ikar di Sarawak, nitihka ku Direktor Opis Pengerara Api enggau Penyah Penusah ( Bomba) Nengeri, Nor Hisham Mohammad.
Ku iya, penyampau kes pemadu tinggi ti nyadi ninting hari iya nya 34 (kes) kena 19 Ogos.
“Kena 20 Ogos, penyampau kes ninting hari labuh ngagai 21 naka pukul 5 lemai. Kesemua penyapau kes ninting hari enda manggai 40 sehari,” ku iya kemari.
Bisi 30 buah opis Bomba di Sarawak, tang semina opis di Mukah enggau Tanjung Manis digerah gawa 24 jam, ku iya nambah.
“Mensia mayuh dilalau anang nunu babas. Sebarang ari penusah angus ti bepun ari pengawa nunu deka mar dirara ketegal hari angat enggau rangkai.
“Berebak enggau nya, sida patut ngeripot ngagai raban bekuasa bekaul enggau jampat enti sema sida tepedaka sebarang penusah angus nentuka ulih jampat ngesah, nyeliahka api ari nyerarai,” ku iya ngelalau.
Ba lansa bukai, Chairman Kaunsil Pelilih Menua Pesisir ( SRDC) Sempurai Petrus Ngelai madah sida bejalaika pengawa matau, nangkan mensia mayuh anang nunu babas kelebih agi ba belakang rumah sida.
Bacha Indeks Penganah Angin ( API) di Kuching, urung pukul 9 pagi kemari, ngerikot bacha jelan peninggi, 93.
Semua kandang menua bukai di nengeri ngerikot bacha jelan API enggau Samarahan (87), Sarikei (84), Mukah (77), Sibu (69) enggau Bintulu (63) ba timpuh ke sama.