Teater Bangsawan Tigundo deka dipandang kena 21 September 2018
KUCHING: Sekula Seni Malaysia Sarawak ngelaluka mensia mayuh ti rinduka teater datai ngemataka pengawa mandangka teater Bangsawan Tigundo kena 21 September 2018 tu, ba auditorium sekula nya ditu.
Teater diarah Cecilia Victoria enggau skrip Moh Azam Rezali, iya nya asil ke penudi ari nembiak Form Lima ke ngambi bidang teater ba Sekula Seni Malaysia Sarawak.
Sebarang tanya bekaul enggau teater Bangsawan Tigundo tau ditanya ngagai Diyana ba lumur 016-8624470; Moh (0126769443) enggau Nurain (014-8854885).
Teater nya nyeritaka pasal gaya jalai pengidup raban bansa Bidayuh ti diau ba kaki gunung.
Peranak Genturung Pendiau Bilingieng sebedau nya ti lemi berubah nasit nengah pemerani Panglima Simongi.
Panglima Simongi diangkat nyadi ketuai lalu ulah iya berubah nyadi jai sereta ransi, laban ti bebakih enggau kuasa ti enda manah ke ngubah ulah sereta nguasa iya. Panglima Simongi masung Ayung Sangon, anak orang kanan iya, lalu ngujungka Ayung ngerarika diri ngagai tuchung gunungsereta udah nya dijaga Dayung Borih ti sama ngerarika diri ari penyai ulah Panglima nya.
Datung Borih nyaga Ayung Sangun ti ngandung nyentuk ngadaka anak ti diberi nama Tigundo. Ayung Sangun mati lalu Dayung Borih nyaga Tigundo ba tuchung gunung.
Pengelama, ulah Panglima Simongi ti dikuasa jai majak jai lalu meri empas ngagai peranak genturung pendiau nya.
Semua peranak genturung pendiau nya bisi bemimpi siku lelaki ke ulih nyelamatka sida ti benama Tigundo. Semina dua iku aja ti enda kala bemimpi betemu enggau Tigundo iya nya Panglima Simongi enggau anak iya Atik.
Ba siti pekara ke nyadi ba tuchung gunung ti ngujungka Atik betemu enggau Tigundo ke nyelamatka iya. Ari nya lalu nempa pengerindu entara seduai iya.
Deka nemu cherita ke nyadi pengudah nya, mensia mayuh dilalau datai meda teater Bangsawan Tigundo nya ila.