Raban bansa Bidayuh diperansang nyukung GSB: Andrew
KUCHING: Parti Bansa Dayak Sarawak Baru ( PBDSB) ngapil ngagai komuniti Bidayuh ngambi meri sukung sida ngagai Gabungan Sarawak Baru (GSB) nengah PBDSB.
Mandal presiden iya, Andrew Puro madahka gempung penyakal ke baru ditumbuh nya nyadi pelasar alternatif ngagai semua peranak Sarawak dikena nentuka peminta sida dipending, kelebih agi ba raban ngaga undang-undang baka Aum Kunsil Nengeri (DUN).
Ku iya, bansa Bidayuh, penyampau tubuh urung 7.8 peratus tauka 217,800 ari semua peranak Sarawak, patut meri PBDSB enggau GSB peluang tama ngagai DUN Sarawak.
“Pengawa Bepilih Nengeri (PRN) Ke-12 semina tinggal dua taun lebih agi , lalu aku enggau ati ti baruh ngapil ngagai bala bakih indu enggau lelaki bansa Bidayuh di Sarawak ngambika bediri di belakang PBDSB enggau GSB nentuka komuniti ulih chakah ngambi bagi ba pemansang rama, ekonomi enggau politik.
“Bansa Bidayuh, sereta bansa Dayak, nyengala tinggal di belakang ba nyauka tetiap pekara. Kitai dalam PBDSB ukai bepilih bulu, tang kitai dekaka pengelurus enggau penyemaka dalam penyereta komuniti ba dagang sereta mega gawa perintah,” ku iya.
Andrew, ti dituduh mangku pengawa mutarka kandang menua Bidayuh, pechaya PBDSB semina deka ngasi agi gawa negika hak sama bansa Dayak nyema sida dipilih ke dalam DUN.
Iya nandu, agenda PBDSB ungkup raban nembiak nyengkaum politik rama, ekonomi, pelajar, pesaka, dagang betanam betupi, penau bansa Dayak, nyadi ketuai enggau integriti, pekara ruang bilik, Dayak Township enggau hak ngempu tanah NCR.
“Sinu amat meda sida ti bisi ba koridor kuasa diatu enda lurus gawa meri hak kitai pengudah sida semina ulih meri surat hak ngempu aja.
“Nama kebuah melit, nambah Seksyen 6A, udah bisi Seksyen 18 dalam Kanun Tanah Sarawak, ti meri hak ngagai peranak Sarawak nyengkaum bansa asal ngempu pala tanah kediri empu?” ku iya.
Andrew pechaya nengah pengawa ‘Ngempung’ parti nengeri tu empu ke alai PBDSB deka ngarika komuniti Dayak dalam semua macham pekara ari polisi perintah nengeri, komuniti Dayak ngambika enda deka tinggal di belakang.
Ku iya, enti sema GSB diberi pengarap megai perintah Sarawak, PBDSB deka ngansak Undang- Undang Tanah Sarawak diubah ngambika hak bansa asal ulih dipebasa ari pengawa ngeluarka undang- undang pala tanah.
Ku Andrew, pengawa udah dipejalai dikena nambahka penampak penatai PBDSB dalam kandang menua Bidayuh.
Ex- senior gawa bank, ke nyadi mandal presiden PBDSB madahka iya udah dituduh mangku pengawa negapka PBDSB ba penampak penatai iya enggau nyadi kaban ba kandang menua Bidayuh.
Ku iya, bala ketuai tetingi PBDSB bisi peransang manah ari ba pengawa PBDSB ke alai berengkah mayuh malik ngagai PBDSB nyadi pengarap baru ungkup penyerakup politik antara bansa Dayak, baka bansa Bidayuh, Iban enggau Orang Ulu di Sarawak.
Direjista kena 2 September 2013, ku iya, PBDSB bisi ati enggau bepilih sereta ngiga enggau mangku pengawa politik ke sekali tu.
Ku Andrew, PBDSB udah ngepunka singkang mansang ke mua, nguji ngaul raban intelektual bansa Dayak nyereta parti sida ngambika PBDSB enda semina ngemata aja ba pengawa bepilih besai.