JKM meri bantu RM5,000 tetiap pintu ti napi penusah angus di Lingga, Lubok Antu
KUCHING: Opis Pengintu Pengelantang Pendiau (JKM) deka meri bantu RM5,000 ngagai tiap pintu ti kena penusah angus di Lingga, Pantu enggau Lubok Antu apin lama.
Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit, Dato Sri Fatimah Abdullah madahka, bantu nya deka diberi nyerumba ngintu Ulang Tahun Hari Keputeraan Rasmi Ke Bawah Duli Yang Maha Mulia Seri Paduka Baginda Yang Di-Pertuan Agong Ke15 Renggat Nengeri Sarawak ti diatur bulan September tu ila.
Bantu nya, maya nya ila disadang disuaka Tuai Pemegai Menua (TYT) Yang Di-Pertua Negeri Sarawak Tun Pehin Sri Abdul Taib Mahmud.
“Kelimpah ari nyuaka hamper sereta bantu mata duit ngagai klien JKM, maya tu ila kitai mega deka meri bantu ngagai sida ti ditinggang penusah angus di Lingga sereta dua buah rumah panjai iya nya di Pantu (Kampung Sungai Merah) enggau San Semanju (Lubok Antu).
“Tu bantu tauka pemeri ari JKM, ti diberi ngena chara meri kereban kena ngaga rumah ti sepenyampau RM5,000 tiap pintu bilik ke kena penusah angus apin lama.
“Di Pantu (Kampung Sungai Merah) bisi 22 pintu, di San Semanju (Lubok Antu) bisi 7 pintu enggau di Linggai bisi sepintu,” ku iya.
Fatimah mansutka pekara nya dalam aum pengarang berita Ulang Tahun Hari Keputeraan Rasmi Ke Bawah Duli Yang Maha Mulia Seri Paduka Baginda Yang Di- Pertuan Agong Ke- 15 Renggat Nengeri Sarawak, ti diatur ba Tingkat 2, Wisma Bapa Malaysia ditu, lemai kemari.
Di Lingga kena 14 Ogos apin lama, sebuah rumah di Kampung Hilir Lingga, Sri Aman kena penusah angus urung pukul 4.25 lemai. Rumah nya bisi enam iku diri sebilik lalu penusah nya nabanka nyadu dua iku diri menyadi Zulkarnain Ajizul, 5, enggau adi iya, Zulfadli Ajizul, 2.
Lalu bepelasarka riput berita kena 19 Ogos apin lama, sebuah rumah panjai 20 pintu iya nya Rumah Museh, Kampung Sungai Merah ba Jalai Pantu angus.
Kelimpah ari nya kena 20 Ogos tu tadi, tujuh ari lapan pintu sebuah rumah panjai iya nya Kampung San Semanju, Jalan Lubok Antu kena penusah angus.