Penusah babas angus kelebih agi ba tanah kerapa mar dirara lalu ngujungka penusah ngagai semua piak kelebih agi raban Bomba
MUKAH: Raban ngatika diri enggau kompeni ti bisi bekebun dandang besai enda patut nunu babas enggau enda dikemata maya musim kemarau.
Kaban Kunsil Nengeri (ADUN) Daro Safiee Ahmad madahka penusah babas angus kelebih agi ba tanah kerapa endang mar dirara enti udah nyerarai.
“Siti ari nya, mar ngulihka pemansut ai enti bisi penusah babas angus tauka tanah kerapa nyadi,” ku iya madah ngagai Utusan Borneo kemari.
Nya kebuah ku iya, penusah angus diatu tau nyerarai ngagai semua endur lalu enda ulih dirara.
“Kelebih agi di kandang menua Daro ti bedau bisi servis enggau perengka guna
Siti ari nya, mar ngulihka pemansut ai enti bisi penusah babas angus tauka tanah kerapa nyadi. Safiee Ahmad ADUN Daro
Bomba enggau Penyah Penusah,” ku iya nerang.
Pelilih Daro diatu bedau bisi Opis Bomba enggau Penyah Penusah, semina bepanggai ngagai Raban Bomba Volunteer (PBS) aja enti sema sebarang penusah angus bisi nyadi.
Opis Bomba pemadu semak iya nya di Mukah, urung dua jam pejalai ari pasar Daro, mega bekenaka servis feri ngelayang Batang Igan.
Safiee dalam pun bulan Ogos tu tadi bisi mantaika pengirau iya ngagai projek Opis Bomba enggau Penyah Penusah Daro beungkus RM 6.8 juta, nyangka enda ulih tembu nitihka timpuh asal.
Opis Bomba nya nitihka pematut tembu kena 10 September tu.
Servis Opis Bomba enggau Penyah Penusah ba kandang menua Daro diperati siti ari peminta laban iya ngaul isu pengelikun peranak.
Kelimpah ari penusah babas angus ti suah diripot nyadi ditu, bisi mega penusah angus rumah ti nyadi apin lama ke udah di Kampung Masjid Daro tang semua sida ke diau dia ulih ngelarika diri.