BriSK udah ngatur Program Servis Komuniti ba Rumah Adong di Sarikei
KUCHING: Briged Volunteer Kolej Komuniti Wilayah Sarawak (BriSK) kena 18 enggau 19 Ogos tu tadi udah ngatur Program Servis Komuniti ba Rumah Panjai Adong anak Nanang, Sarikei.
Program dua hari berunggu nya disereta 128 iku nembiak enggau bala staf Kolej Komuniti Wilayah Sarawak.
Antara tuju ngatur program nya dikena mantu raban komuniti menua nya ngena chara volunteer nyeleti rumah panjai ti udah luya, ngaga bim tangki ai, nukar baru tali karan ti udah lama, ngechat rumah enggau ke bukai.
Berebak enggau nya, bala pesereta program ulih bekenaka pengelandik sida kelimpah nerenakka pemanah ulah ba sida.
Nengah program baka tu mega raban sida beratika peneguh kaul kerejasama antara nembiak ari tetiap kolej sereta penau sida bekenaka pengelandik ti dipelajar dikena mantu raban ti begunaka bantu nadai ngira bansa.
Bela nyempulang Direktor Kolej Komuniti Sarikei, Rosilawati Mohd Rasol, enggau Direktor Kolej Komuniti Tampin CR Ramlee Yahya, lalu nyadi Chairman BriSK nasional ti udah bejadika program nya.
Nitih ku CR Ramlee, iya chukup temegah ati enggau pemujur program nya kelebih agi pengudah meda asil kereja bala nembiak ti mega disaup bala staf kolej.
“Aku meda pengeran enggau komitmen ti diberi bala nembiak enggau staf kolej nembuka kereja nyeleti enggau ngaga bim tangki ai sereta kereja volunteer ke bukai.
“Tambah mega, pekara ti ngasuh ati temegah iya nya kitai ulih nyediaka dua buah tangki ai dikena nampung peminta peranak Rumah Panjai Adong anak Nanang maya bisi penanggul bekal ai tejanggal.
“Komitmen baka tu patut ditampung enggau semengat dalam ati ngambika kitai ulih nyadi komuniti ti bisi penyiru,” ku iya lebuh bejaku ba atur pengawa apin lama ke udah.
Nangkan nya, rumai panjai ti udah diuwan lebih ari 10 taun semina bisi siti tangki ai ti dikunsi 17 pintu bilik maya penanggul bekal ai tejanggal nyadi.
“Ari pemisi dua tangki ai tambah tu, ulih dikena kami maya penusah ngenyit nyadi, bekal ai tejanggal,” ku iya nandu.