Antu pala ba Kubu Emma mujur dipindah ngena jalai adat asal Iban
KANOWIT: Jerita tuai ti madahka antu pala ba Kubu Emma ditu nemu mindah kediri maya malam hari.
Bisi sekali lebuh siku staf perintah bemalam ba kubu nya tepedaka antu pala bisi ba geladak pagi siti.
Nadai sapa nemu baka ni nya tau dia.
Pekara tu nyadi rambau kubu tu agi nyadi opis perintah ba ujung taun 1980-an enggau pun taun 1990-an.
Semua bisi semilan antu pala lalu nyentuk ke sehari tu nadai orang ulih nyaut sapa bagi antu pala tu ke amat.
Pengawa miring khas diatur kena 8 Ogos ba Kubu Emma dikena mindahka antu pala ngagai langkau ti didiri ba laman kelai pasar tu.
Pengawa mindahka antu pala dikena meri awak pengawa ngemanah enggau kereja ngintu kubu nya ti digaga jeman Rajah Putih dalam taun 1851 ba tengah pasar.
Iya udah nya dipindah baru ngagai endur ke diatu, ba peripir bukit nunga pati Batang Rajang enggau Sungai Kanowit dalam taun 1859.
Diberi nama ngangkatka menyadi indu tuai Charles Brooke, Emma, kubu tu dikena raban British matau aktiviti raban bansa Dayak dia suba.
Nikalka kenang ngagai antu pala, pengawa miring dikena ngibun (bebaik) semengat antu pala.
Antu pala tu dipelaba datai ari bansa Beketan ti dipumpung bansa Iban lebuh pengawa ngayau agi dikemeran kelia.
Enti enda, sida deka ngaga ngachau, pia ku ex-Kunsilor Kaunsil Pelilih Kanowit, Kujat Dudang.
“Pengawa miring tu bebida ari ti suah dipeda kitai. Ketuai miring meseti orang ti kala bedengah.
“Enti dikereja orang bukai, kitai pechaya orang nya deka alah bulu tauka semengat iya deka direkam semengat antu pala nya,” ku iya nerang.
Kujat begulai enggau Penghulu Ugap Seribu sereta penerima Pingat Gagah Berani (PGB), Lans Korperal (Pinchin) Sigai Endawan @ Nawan, miring sehari nya.
Sigai nyadi ketuai sida. Iya kala munuh dua iku munsuh lebuh operasyen ba Ulu Dap ditu jeman penyelawai kominis dalam bulan Mei 1972.
Sida mega bisi manchak dua iku jani. Siku dipilih ungkup pengawa nya udah kala beranak tiga kali lalu siku agi jani biak.
“Dikena mindahka antu pala ari begunan kubu, kitai manchak jani tuai. Jani biak dibanchak ba dampa, endur ngengkahka antu pala,” ku Ugap.
Ugap, Kujat enggau Sigai mega bela diberi tajau, selambar kain enggau duku siti siku, laban udah bejalaika pengawa nya.
Sida tiga enggau semua tubuh ti enggau nyendiaka rengka miring udah nya bejalaika pengawa nyenguk tajau enggau ngetup duku kelai atur pengawa tembu.
Berebak enggau nya, kubu nya diatu benung dalam proses diangkatmanah sereta diintu ngena ungkus RM5 juta, ti dipejalaika Crest Realty Sdn Bhd dibaruh kemata Opis Kereja Raya (JKR).
Enti udah tembu dalam bulan Febuari 2020, kubu ti kala nyadi Galeri Sejarah Kanowit deka diangkat nyadi Muzium Pesaka Kanowit.