Kena leka jaku ‘mindah’, ukai ‘munas’: SFC

KUCHING: Sarawak Forestry Corporation ( SFC) ngansak mensia mayuh anang ngena leka jaku ‘munas’ ba pengawa nagang pemayuh jaku ba Sarawak.

Manah agi ngena leka jaku ‘ mindah’ baya ari sungai ti bisi baya ngagai endur bukai, ku pengari SFC lebuh dikerandau kemari.

Pengari nya dipinta meri timbal ngagai berita ba lambar mua ti ngambi jaku Menteri Muda Kaunsil Kandang Menua, Datu Dr Penguang Manggil, ke alai sekeda baya ba Sungai Bakong di Miri patut dipunas (dibunuh) berindik ari majak mayuh kes ditagup jeku nya ngagai orang dia lalu dikena nagang penusah majak nyadi.

Kaban Kunsil Nengeri ( ADUN) Marudi mansutka jaku nya pengudah penusah siku lelaki, Mangku Sulo, 56 taun, peranak ari Rumah Pen- ghulu Benang di Marudi ditagup baya, lebuh nyala ba sungai begulai enggau lima bakih ke bukai kena Hari Minggu.

Mangku mujur nyelamatka diri lalu bisi 12cm pemanjai abi ketup ba kaki kanan iya. Iya nerima perubat lalu belinsur suman ba Sepital Miri.

Pengari SFC madahka Dr Penguang bisi hak mansutka penemu iya empu, kala nyadi pemesai kanan Opis Kampung sereta orang ti patut nemu ngulihka statistik enggau penerang silik.

“Opis Kampung nyadi raban ti ngeluarka permit ungkup guna komersil ba pengawa mutarka penanggul enggau keruga (baya) tu. Udah nya, SFC’s SWAT (tauka Swifth Wildlife Action Team) deka bejalaika operasyen ngagai renggat baruh. Ngagai sida SFC, leka jaku ‘ munas’ nadai kala dikena sebedau tu,” ku pengari nya.