PEDAS minta mensia mayuh gerah jari besaup mantu raban ti seranta
KUCHING: Serakup Dayak Sarawak (PEDAS) mai mensia mayuh bela gerah jari, ba pengawa kasihka mensia, besaup mantu raban ti seranta enggau begunaka bantu baka kes siku anak mit bansa Iban, benama Ajalena, beumur setaun lebih.
Ajalena diibun inik iya pengudah ditinggal apai indai iya, dipasuk berubat ba Sepital Nyabau, Bintulu kena 9 Ogos tu tadi ketegal Malnutrition (kurang zat pemakai).
Nitih ku tusi inik iya ngagai Pete Bujang, Ketuai Pampang PEDAS Bintulu, Ajalena semina nusu tusu Chap Junjung aja laban suntuk belanja, ngujungka Ajalena tasal, pemesai tauka pemerat semina 4kg aja, ti enda setipak enggau umur tudah.
Senentang gaya pengerai ku Pete lebuh ngabas kena 19 Ogos, Ajalena agi ditan ba wad sepital nya nganti pemutus peresa darah lalu udah belinsur gerai, ulih nerima (nusu) tusu bukai (kelimpah ari tusu chap Junjung), lalu bagas nusu diatu.
“Kitai besampika pengerai seduai meuchu, diau lantang sereta enda mantul ati napi penguji. Besai pengarap kitai deka meda seduai idup meruan baka pengidup orang bukai.
“Nya kebuah kami ari PEDAS minta saup mensia mayuh ngelempungka penusah seduai tu nyengkaum ari sukut belanja enggau bantu bukai.
“Nadai ngira sida ti ngatika diri, raban ari gempung ukai dikuasa perintah, gempung korporat enggau ejensi bekaul bela gerah jari,” ku Pete nandu.
Pete madahka tulung enggau sukung ari semua dikearap ulih mai pengelantang lalu ukai deka ngiga nama ba pengawa baka tu, tang ngelaika penyinu enggau penyiru ari raban PEDAS.
Pete mega meri besai terima kasih ngagai semua ti nadai kala leju besaup mantu, sekalika ari mata duit, sampi enggau jaku peransang sereta mega bantu bukai.