PEN udah ke rumah panjai Penan di Telang Usan deka mutarka penanggul tingki
MIRI: Penan Empowerment Network ( PEN) bejalaika inisiatif ngabas enam buah rumah panjai bansa Penan ba Telang Usan, apin lama ke udah, dikena ngelala peranak ti napi penanggul ngembuan tingki.
Chairman iya, Elia Bit madahka Gempung Ukai Dikuasa Perinta (NGO) nya udah berandau enggau bala ketuai ari enam buah rumah panjai iya nya Long Liwok, Long Kevok, Long Sayan, Long Latei, Long Beluk enggau Long Jenalong.
“Rambau pejalai nya, kami udah nyadung pom ngagai bala ketuai ari enam buah rumah panjai nya ngambi ngelis nembiak redak sida ti agi napi penanggul ngulihka tingki.
“Lis ti diulih kitai tu ila deka disua ngagai Opis Pengerejista Bansa (JPN) ngambika Unit Khas Mindah Kin Kitu Pampang Miri ( UKBM) ulih ngatur pejalai ngelawa genturung pendiau tu,” ku iya ba sebengkah penerang berita kemari.
Iya madah rambau pejalai nya, antara penanggul ditapi sida ti bedau bisi tingki iya nya peranak apin ditentuka.
“Nyangka tu ketegal siku ari apai tauka indai nembiak mit tu datai ari menua bukai baka Indonesia tauka Filipina, nya ngujungka nembiak mit tu bepanggul ngulihka tingki.
“Kes ti suah nyadi iya nya laun rejista pengada ketegal penekul belanja enggau perengka pengangkut, ti ngujungka sida nganti lama ngulihka tingki, bisi sekeda nganti dataika lima ngagai 10 taun,” ku iya.
PEN arap sereta pechayaka perintah baru deka beratika penanggul tu kelebih agi peranak asal Sarawak lalu numbuhka sebuah ‘Task Force’ gawa mutarka penanggul ngulihka tingki ti ditapi peranak bansa asal.
Pejalai sida ngelawa rumah panjai nya mega disempulang Chairman Serakup Ngintu Pengelantang Urimai Selangor, Manikavasagam Sundaram enggau Chairman Malaysia Tamillar Munettra Kalagam, Sri Ramesh.