Distrepark Sdn Bhd mujur ngemansangka rampa menua di Sibu Jaya
SIBU: Pengeransing kompeni Distrepark Sdn Bhd ngemanahka landskap genturung pendiau enggau kedai di Sibu Jaya ngena chara kediri empu mujur nejuka mengeri baru nya nyadi moden agi.
Chairman Opis Kaunsil Menua Pesisir (SRDC) Sempurai Petrus Ngelai madah, kompeni nya ukai semina ngemansangka genturung pendiau enggau kedai tang chara ke dikena sida bepelasarka ‘building and landscaping’.
“Ambika chunto baka ba ‘Sapphire East’, rumah enggau kedai dia digaga enggau tukuh ti baru sereta moden.
“Tu nejuka Sibu Jaya nyadi mengeri ti moden,” pia ku iya madah. Iya mantaika jaku nya maya pengerami bejadi Fi- esta Sibujaya Ambang Merdeka, malam ensana. Nambahka jaku iya ku Sempurai, SRDC mega semampai chakah ngemansangka Sibu Jaya ukai semina disebela tang mega ngemeratka landskap ti manah sereta ser- irih enggau tuju deka ngintu rampa menua.
Iya mega besemaya deka mutarka nama-nama isu ke bisi nyadi nuntung mensia mayuh ke dipegai SRDC lebih agi di Sibu Jaya.
“Kitai bela chakah deka ngangkatka pemanah servis nitihka pematut enggau peminta mensia mayuh maya hari tu,” ku iya madah baru.
Bekaul enggau Fiesta Sibujaya Ambang Merdeka ti diatur berengkah 21 Ogos nyentuk 2 September tu, Sempurai ngarapka semua piak bela beratika reti ‘bulan penyerakup’.
“Semua kitai besaup ngetan penyerakup antara pangan diri ngambika nengeri Sarawak sereta menua Malaysia semampai likun,” pia ku iya madah.