Kelas main asal ti dipejalaika Asadia nyaup ngerembaika kaul ba bansa Dayak
KUCHING: Nempa sereta ngerembaika integrasyen raban bansa Dayak entara juluk Akademi Sarakup Dayak Iban Sarawak (Asadia) ngatur kelas belajarka main asal nyengkaum kelas belajarka sape.
Ketuai Asadia Mabong Unggang madahka main asal baka sape nya mega ulih mantu nyungkak ekonomi pengemeran tauka pemain sape nya empu.
Berindik ari pekara nya Asadia ku Mabong terus ngatur kelas belajar main sape lalu diatu benung diatur ba renggat ke- 6.
“Nambahka nya, juluk kami ke ngatur kelas tu mega ukai semina deka nentuka main asal nya ditampung rebak ke baru sereta dudi kelebih agi bala nembiak, tang mega chara nempa integrasyen ba raban bansa Dayak.
“Main asal tu mega ulih dikerembaika nyadi sebengkah industri ke ulih mantu nambahka penatai pemisi pengemeran.
“Ambika chunto, orang ti landik ngaga kereban sape deka bulih asil ari pengawa nya laban mayuh pemain enggau orang ti rinduka sape deka meli kereban nya,” ku iya.
Nitihku iya madah ngagai Utusan Borneo, kelas belajar sape renggat ke- 6 Asadia dipasuk urung 10 iku orang.
Naka ke diatu, ari reng- gat keterubah ngagai Ke-5, Asadia udah mujur nempa urung 75 iku orang ti landik nebah sape.
Sida ke udah landik tu bisi kala dikangauka merindang ba pengerami lebih agi ke bekaul enggau main asal, ke bisi diatur ba mengeri Kuching.
Kelas nya diajar siku orang ti landik bemain muzik sape iya nya Ngo Hawing, lalu kelas nya diatu ba Opis Sadia di Kota Sentosa ditu, tiap Hari Lima (Jumaat) pukul 7.30 malam.
Sebarang penerang silik ke deka ditemu bekaul enggau kelas main asal ke bisi diatur Asadia tau ditanya ngagai Mabong ba lumur 012-6925562.