Siku lelaki beumur 44 taun nadai ketegal rabies

KUCHING: Ketegal nyelamatka nyawa bini diketup siku ukui lelang, siku lelaki kena rampit rabies lalu udah dituku parai urung pukul 10.15 pagi kemari.

Lelaki beumur 44 taun ari Jalai Matang, semak ditu dipasuk ngagai wad Sepital Besai Sarawak (HUS) kena 16 Ogos tu tadi lalu asil peresa sampel klinikal ti dipejalai ngenukuka iya positif rampit rabies.

Nitih ku Ketuai Direktor Pengerai Malaysia, Datuk Dr. Noor Hisham Abdullah ba sebengkah penerang kemari, belalauka penerang, niang nadai sejarah diketup ukui tauka jelu bukai tang kala malu siku ukui lelang ti udah ngetup bini iya kena 13 Januari nyin tadi.

Ku iya, lebuh nya, niang bisi abi telih ba jari kanan lalu ukui dipalu niang mega mati.

“Pemarai niang ketegal Rabies Encephalitis. Opis Menteri Pengerai Malaysia ngenataika penyinu ati ngagai sida niang sebilik,” ku iya.

Ngelansa silik, Dr. Noor Hisham madahka niang nadai kala nerima perubat taja udah dibai bini iya ngagai sepital ngambika diperubat enggau tuchuk vaksin.

Niang berengkah sakit ba jari kanan dalam pun bulan Ogos tu tadi lalu udah nerima perubat pesakit pulai hari kena 6 Ogos tu tadi.

Niang majak balat sakit kenyau ari 11 Ogos, bisi penat isi, lemi jari kanan, enda ulih mindah, besintak ba rekung enggau hidrofobia.

Taja pia, kandang diatu, bini niang agi gerai lalu udah nembuka timpuh tuchuk vaksin anti rabies sepenyampau 4 dos.

Kenyau ari rabies dituku ngelekai ba Sarawak kena 30 Jun 2017 nyentuk 21 Ogos 2018, penyampau kes ngagai mensia iya nya 13 kes nyengkaum 12 parai, enggau penyampau pemarai 92.3 peratus.

Semina siku aja pesakit ti udah pansut ari sepital tang enggau komplikasi neurologi ti balat lalu diatu agi berubat ba rumah.