Ngambika sida bisi permit gawa laban JIM semina ngeluarka pas sosial, ku Ken
KUCHING: Pengaji nyengkaum pengaji kedai kopi di serata nengeri tu diperansang tauka dilalau ngerejista pengereja pengawa ari menua luar ba Jabatan Tenaga Kerja (JTK) awakka bisi permit gawa.
Direktor Opis Imigresyen Malaysia ( JIM) Nengeri Sarawak, Ken Leben madah laban Opis Imigresyen semina ngeluarka pas sosial enti sida nengah pintu penama garis entara menua.
“Kitai patut nemu ditu bisi dua intiti ke enda sama, iya nya JIM ngeluarka pas lalu JTK ngeluarka permit, lalu tu enda ulih dipegulaika laban ejensi pengari tu bela bejalaika undang- undang kediri empu.
“Lebuh orang ari menua luar datai kitu nengah pintu penama sida tama ngena pas sosial pengelama 30 hari, tang sida salah guna pas nya, dikena gawa.
“Udah tentu bisi orang mai pekereja ari menua luar ke Sarawak, engka nya kes mit, aku enda ulih nentuka,
Kitai patut nemu ditu bisi dua intiti ke enda sama, iya nya JIM ngeluarka pas lalu JTK ngeluarka permit, lalu tu enda ulih dipegulaika laban ejensi pengari tu bela bejalaika undang-undang kediri empu. Ken Leben Direktor Opis Imigresyen Malaysia (JIM) Nengeri Sarawak
aku deka meda tauka meresa baru,” ku iya.
Ken mansutka ke penerang nya lebuh ditanya bekaul enggau operasyen ti dipejalaika JTK ba sekeda endur di mengeri tu, ke alai bisi pengereja pengawa Indonesia ke gawa ba kedai kopi ti bisi permit tama tang nadai permit ari JTK.
Dulu ari nya Ken ngulu Pengerami Qurban JIM Nengeri Sarawak enggau Opis Bomba enggau Penyelamat Sarawak (Balai Boma enggau penyelamat Petra Jaya) ke diatur ba Surau Darul Hamra, Balai Bomba enggau Penyelamat Petra Jaya ditu, kemari.
Bejaku baru, iya madahka JIM chakah bejalaika operasyen di serata nengeri tu, bekaul enggau orang tama enda beradat tauka belalai (PATI) ke Sarawak.
“Dalam taun 2018, naka ke diatu kitai udah nangkap 1,112 iku PATI dalam mayuh bengkah operasyen ba mayuh sektor di serata Sarawak.
“Penyalah sida tu mayuh macham, keterubah ngena pas sosial tang gawa, kedua, pas udah mati timpuh, ketiga, orang nya patut gawa ba endur A tang gawa ba endur B, lalu keempat, endang nadai pas tama kitu reti nya nengah jalai chit enggau ke bukai,” ku iya.
Nyempulang Ken kemari, sapit iya, Hamfatullah Syawal Hamdan enggau ke bukai.