JIM, JPBM Sarawak begulai ngereja ‘korban’ dikena ngerami Hari Raya Aidiladha

KUCHING: Opis Imigresyen Malaysia (JIM) Nengeri Sarawak enggau Opis Bomba enggau Penyelamat Malaysia (JBPM) Sarawak Pampang Petra Jaya ngerapitka agi kaul nengah pengerami ngintu Hari Raya Aidiladha, kemari.

Kededua opis nya ngatur aktiviti pengerami nya nengah pengawa nyanyat tujuh iku chapi enggau empat iku kambin, nyengkaum lima iku chapi enggau dua kambin ari Opis Bomba sereta dua iku chapi enggau dua iku kambin ari JIM.

Nitih ku Direktor JIM Nengeri Sarawak, Ken Leben madahka tu kedua kali sida bekerejasama nyerumba pengerami Hari Raya Aidiladha ti diatur Balai Bomba Petra Jaya.

“Objektif program ke sekali tu dikena bejalaika ‘ibadah korban’ seraya ngerapitka agi kaul entara opis ke endang lama udah ditanggam nyengkaum enggau peranak ngelingi tu.

“Dagin korban deka diagihka ngagai nembiak Tahfiz Al Makki Lit Tafaqquh Fiddin, Kampung Semariang Pinggir, orang seranta sereta ‘asnaf’ ari peranak ngelingi tu sereta mega diagihka ngagai pemesai JIM enggau Bomba Pampang Petra Jaya.

“Tu kedua kali kami JIM bekerejasama enggau Balai Bomba Petra Jaya,” ku iya.

Ken dikerandau raban pengarang berita lebuh ti datai ba Pengerami Qurban Opis Imigresyen Malaysia Negeri Sarawak enggau kerejasama (Opis Bomba enggau Penyelamat Malaysia Nengeri Sarawak ( Balai Bomba & Penyelamat Petra Jaya), ti diatur ba Surau Darul Hamra Balai Bomba dan Penyelamat Petra Jaya ditu, kemari.

“Enggau peluang tu aku ngarika Opis Imigresyen enggau Opis Bomba meri Selamat Hari Raya Aidiladha ngagai semua ke ngintu,” ku iya.

Bisi 250 iku pemesai ari kededua opis nya sama ngambi bagi ba program ke diatur taun tu.

Opis Imigresyen ngarapka aktiviti ti baka nya ulih diatur jemah ila.

Sama bisi datai Sapit Direktor Jabatan Imigresyen Malaysia Negeri Sarawak, Hamfatullah Syawal Hamdan sereta Sapit Ketuai Balai Bomba enggau Penyelamat Petra Jaya, Wan Umar Wan Alek.

BESAUP: Pemesai Bomba besaup mela dagin chapi ke deka diagihka.

DEKA DIAGIH: Pemesai JIM beripai mela dagin chapi ke deka diagihka.

— Gambar Chimon Upon BERIPAI: (Dua ari kiba) Ken ngerat dagin chapi seraya diperatika (dua ari kanan) Wan Umar sereta ke bukai.

— Gambar Chimon Upon KELAI: (Kanan) Ken ngagihka dagin korban ngagai siku ari penerima ke dikangau ngagai pengerami nya, lalu diperatika (belakang, ari kiba) Hamfatullah Syawal enggau Wan Umar sereta ke bukai.