Diatu sida agi nganti surat rasmi ari ROS bekaul enggau pemendar rejista GPS, ku Abang Johari
KUCHING: Pengerami bejadika Gabungan Parti sarawak (GPS) ditangguh dulu nyentuk ke rejista parti nya bulih pemendar ari Opis Pengerejista Gerempung (ROS).
Gempung parti politik ari Sarawak baru nya, ti ditagit dipenyadi kena 22 Julai 2018 pengudah penumbuh nya dibantaika Kepala Menteri Datuk Patinggi Abang Johari Tun Openg kena 12 Jun 2018.
Iya madahka diatu sida agi nganti surat rasmi ari ROS bekaul enggau pemendar rejista GPS.
“Rejista GPS enggau ROS tau dipadahka udah dikemendar. Diatu kitai semina nganti surat rasmi ari ROS bekaul pekara tu.
“Kitai deka bejadika GPS, anti aja. Kitai nganti aja, maya nya deka datai ila,” ku iya.
Iya madahka pekara nya lebuh dikerandau raban pengarang berita pengudah bejadika ‘Majlis Qurban Aidiladha dan Pengagihan Sumbangan Daging Korban’ ti diatur Nembiak Parti Pesaka Bumiputera Bersatau (PBB) ba tengah laman Palan Servis PBB Satok ditu, kemari.
GSP iya nya gempung parti politik ari Sarawak sereta dipasuk empat parti ti kala nyadi komponen Barisan Nasional (BN) iya nya PBB, Parti Rakyat Bersatu Sarawak (SUPP), Parti Rakyat Sarawak (PRS) enggau Parti Demokratik Progresif (PDP).
Nya ditumbuhka berindik ari BN ke udah alah maya Pengawa Bepilih Besai Ke-14 (PRU14) kena 9 Mei taun tu, sereta tetap nyadi penyakal ba perintah besai ke dipegai Pakatan Harapan (PH).
Taja pia, GPS madahka sedia bekerejasama enggau perintah besai.
Kena 23 Jun 2018, Chairman Komiti Teknikal GPS, Datuk Alexander Nanta Linggi ba sebengkah aum pengarang berita, madahka komiti nya dipasuk sekretari besai semua empat parti ti numbuhka gempung baru, ti dipenyadi kena 22 Julai tauka sebedau pengerami ngintu Hari Sarawak taun tu.
Rejista GPS enggau ROS tau dipadahka udah dikemendar. Diatu kitai semina nganti surat rasmi ari ROS bekaul pekara tu. Datuk Patinggi Abang Johari Tun Openg Kepala Menteri Sarawak