Penerang Masing ngasuh saru sereta enda amat, ku See
KUCHING: Mandal Chairman PKR Negeri See Chee How dipelabaka mai Sapit Kepala Menteri Tan Sri Datuk Amar James Masing ngagai Komiti Khas ba Aum Kunsil Nengeri (DUN) ke deka datai.
See ti mega Kaban Kunsil Nengeri (ADUN) Batu Lintang madah, laban Masing meri penerang ti ngasuh saru sereta enda amat ngagai Dewan pasal projek Jalai Besai 2 (2TR) ke diperambu.
Ku iya, mayuh penerang Masing ti mega Menteri Pemansang Infrastruktur enggau Perengka Pengangkut ti bebida lebuh ke nyimpul jurai sekalika maya DUN November 2017 enggau Julai taun tu.
“Senipak enggau Perintah Tetap DUN, aku ngenataika sebana ngagai Speaker DUN (Datuk Amar Mohd Asfia Awang Nassar)ngambika mai iya ngagai Komiti Khas ba auam DUN ke deka datai.
“Nyemapekara tu enda diputarka jampat Speaker tauka Dewan senipak enggau undang-undang tauka di baruh Perintah Tetap dikena mutarka ‘pelanggaran keistimewaan’,” ku iya ba aum pengarang berita ke diatur ba opis PKR ditu, kemari.
See madah, sapit kepala menteri nya enda madah penerang ke amat pasal projek perambu 2TR dalam penerang iya.
Iya madahka kar projek ti dikeluarka portal online ti dipadahka atas nama Masing, nadai Pakej B tauka Seksyen 2, dibantai sekalika maya DUN November 2017 tauka Julai taun tu.
Tang tiga ngagai empat seksyen ti dipadahka dalam nya bebida enggau utai ke dipadah Sapit Kepala Menteri ba DUN sekalika November taun nyin kemari tauka Julai 2018.
“Aku deka ngelalau iya (Masing) ngambika bejejimat agi enggau penerang ke ditulis sereta dipansutka atas nama iya slalu iya patut meresa semua penerang ti dipansutka sebedau tu.
“Enti enda, ukai semina nama tauka reputasyen iya kamah tang mega nama enggau reputasyen kabinet nengeri ti meri penerang ilap sereta ngasuh saru,” ku iya.
See bejaku munyi nya bekaul enggau penerang ‘ eksklusif’ ti dipansutka sapit kepala menteri nengah sebuah portal online ti dikeluar tiga hari ke udah pasal projek 2TR ti betajuk “Masing refutes assemblyman’s claims about Coastal Road, Secondary Trunk Road projects”.