Eksibisyen SCIENCE diatur ba CityONE Megamall kena 25-26 Ogos
KUCHING: Nyelinting raban nembiak ke deka nemu sereta ngembuan pengerindu ba bidang sains enggau mekanik, Eksibisyen Pekit Injinir Inovasi enggau Komuniti Sarawak ( SCIENCE) deka diatur ba CityONE Megamall ditu belabuh sehari tu nyentuk pagila (25 enggau 26 Ogos).
Berambaika jaku, ‘ngenegapka runding raban orang bik, SCIENCE diatur Learning Curve (TLC) lalu dipelanja Sarawak Energy Berhad (SEB).
Tuju iya dikena meransang pengerindu ngagai bidang sains, teknologi injinir enggau matematik (STEM) kelimpah mandangka aplikasyen pengidup ke nyata ari utai ke dipelajar ba dalam kelas asil tengkebang raban nembiak, bengkel enggau pekit robotik, sesi kraf enggau seni ungkup nembiak sereta mayuh main ke bukai.
SEB nyukung pemansang enggau pelajar nembiak lebih agi matapelajar bekaul enggau sains, teknologi enggau injinir.
“SEB endang pengasil kuasa karan ba nengeri tu, bekal karan ruang bilik enggau dagang ba serata Sarawak enggau penatai asil ke beresi sereta diproses baru.
“Berebak enggau pemansang ke majak nyingkang nyadi utiliti digital diumba teknologi, kitai pechaya nengah beranakka puku dudi hari raban nembiak di Sarawak diberi biasiswa ninting taun lalu diperansang nengah mayuh program pelajar ke bukai.
“SCIENCE endang pelasar baru fokus ngagai pengawa inovasyen ba raban nembiak nengeri tu,” ku Ketuai Peme- sai Eksekutif Gerup SEB Sharbini Suhaili.
Iya mega meri terima kasih ngagai Learning Curve laban udah milih SEB nyadi bakih kunsi korporat lalu SEB chukup gaga ati melanja SCIENCE nyadi program chap ti ngiring inovasyen dudi hari.
“Kitai ngarap tu deka nyendiaka pugu ngagai program ti deka ngerembai ba serata nengeri dikena meransang kreativiti ba raban nembiak di serata Sarawak sereta meri penyedar ngagai pemesai guna pelajar STEM enggau chara nguna iya,” ku Sharbini.
“Kami meransang apai indai mai bala anak sida ngulu eksibisyen SCIENCE ke chukup manah tu,” ku Penengkebang Begulai Learning Curve Kenneth Chai.
Urung 12 sekula bisi ngambi bagi ba genap tim tu berengkah kenyau minggu nyin kemari ba pengawa ngagai pelin tekat hidroelektrik, stesyen pengechas kuasa solar enggau kerita elektrik.
Pemesai guna tu lebih agi ba raban nembiak ke bisi pengerindu bekaul enggau robotik nyadi bisi Pekit Trofi Robot.
Pesereta deka diberi perengka dikena ngaga robot enggau pemenang ke pemadu manah deka diberi perais ke manah.
Licha mega bisi diatur nyengkaum bekaul enggau robotik sereta profesyen dalam STEM lebih agi ungkup sida ke indu.
Mensia mayuh dikelalu ngulu pengawa tu laban tama nadai bebayar, kelimpah bisi aktiviti diatur ba Atrium Utama ba ringkat baruh berengkah 10 pagi nyentuk 6 lemai sekumbang dua hari tu.