Tu dikena nentuka sistem undang-undang adat Bumiputera nitihka ubah jeman ke diatu seriris enggau pemansang

KUCHING: Tusun undangundang Kort Bumiputera Sarawak deka diserenih baru ngambi ulih nentuka sistem undang-undang adat Bumiputera nitihka ubah jeman ke diatu.

Dikena ngemujur juluk nya, Kepala Menteri Datuk Patinggi Abang Johari Tun Openg dekaka raban Kort Bumiputera Sarawak ti betuaika Ketuai Pengerijista Datu Michael Dawi Alli numbuhka siti komiti ngambi tau bejalaika pansik.

Ku iya, pansik ke silik sentang perambu nyerenih baru struktur undang-undang Kort Bumiputera Sarawak meseti digaga dulu sebedau perambu nya dibantai ngagai Perintah Nengeri.

“Jeman majak nyingkang lalu rayat diatu udah majak mansang ke alai kitai meseti nyerenih baru sistem undang-undang ke bisi diatu bepelasarka undang-undang adat Bumiputera.

“Ketegal nya aku setuju enggau perambu beratika baru penuduk Kort Bumiputera ke udah lama ditumbuh sereta dikena ditu.”

“Tang kitai meseti numbuhka komiti ‘khas’ ke mungkur raban ketuai, orang ke landik ba pekara undang-undang adat Bumiputera nyengkaum raban akedemik,” ku iya.

Abang Johari mansutka jaku nya ba Pengerami Makai Lemai Genap 25 Taun Opis Pengerijista Kort Bumiputera Sarawak ba sebuah hotel ditu, malam ensanus.

Iya nambah, dikena nentuka undang-undang adat Bumi- putera mengkang engkeman nitihka jeman diatu, randau meseti digaga entara raban Kort Bumiputera Sarawak sentang chara ngenuku struktur kort ke manah.

Ku iya, enti Kort Bumi- putera Sarawak deka ngatika diri sereta bisi otonomi baka kort bukai, pansik meseti digaga ba semua sukut.

“Perintah Nengeri meretika pekara tu lalu kitai nyukung atur ke deka digaga raban ba Kort Bumiputera Sarawak ti betuaika Datu Michael Dawi,” ku Abang Johari.

Opis Pengerijista Kort Bumiputera Sarawak ditumbuh ba taun 1993 dibaruh kuasa Ordinan Kort Bumiputera 1992.

Rambau pengerami malam nya, Abang Johari bisi nyuaka basa ‘khas’ ngagai sida ke kala mangku pengawa nyadi ketuai pengerijista Kort Bumiputera Sarawak.

Entara ke nerima, niang Andrew Salip Ridu (April 1993-1995), niang Empeni Lang (Jun 1995-Disember 2005), Ronnie Edward (Januari 2005- Disember 2013), Hang Tuah Merawin (September 2010-Oktober 2011) enggau Datu Ganie Ugay (Januari 2014- Mac 2017).

Basa khas mega diberi ngagai ex-majistret Kort Mahkamah Bumiputera Residen lalu entara ke nerima iya nya niang Patrick Rigep Nuek, niang Isaka Kana, Patrick Chaong, Peter Nyaid, Jemat Manggie enggau Leo Jana Etin.

Ungkup ex- majistret ba Kort Bumiputera Pelilih Menua, sida ke nerima iya nya Geffrey Usa Baling, Peter Mandy, Walter Chambers Najod, Simon Awang Sorep, mendiang Michael Napil Jawip, Datuk William Nyallau Badak, Henry Ginjom Lajim, Joseph Jinam, Terrence Firaon Masir, Drahman Amit enggau Philip Ho Thian Huat.

Bela datai, bini Kepala Menteri Datin Patinggi Dato Jumaani Tuanku Bujang, Sapit Kepala Menteri Datuk Amar Douglas Uggah Embas, Menteri Muda UndangUndang enggau Adat Bumiputera, Datuk John Sikie Tayai, Speaker Dewan Undangan Negeri, Datuk Amar Asfia Awang Nasar enggau orang bukai.

Jeman majak nyingkang lalu rayat diatu udah majak mansang ke alai kitai meseti nyerenih baru sistem undangundang ke bisi diatu bepelasarka undangundang adat Bumiputera. Datuk Patinggi Abang Johari Tun Openg Kepala Menteri Sarawak