Peminta Nembiak AMANAH Sarawak enda dikeibuh KM
KUCHING: Kepala Menteri (KM) Datuk Patinggi Abang Johari Tun Openg enggai kiruh enggau pinta Nembiak AMANAH Sarawak ti dekaka Perintah Nengeri meresi nama sekeda orang ke ditagang tama ke Sarawak.
Pinta dikenatai Ketuai Nembiak AMANAH Sarawak Mohamad Fadillah Sabali pengudah Sapit Ketuai AMANAH Negara ( Nasional) Shazni Munir Mohd Ithnin ditagang tama ke Sarawak kemari.
“Nibuh disaut pinta ke baka nya,” ku Abang Johari nyaut pandak tanya pemberita di Wisma Bapa Malaysia ditu, kemari.
Dulu agi ari nya, Abang Johari ngulu Pogram Korban ke diatur Opis Kepala Menteri (JKM) di Laman Begunan Wisma Bapa Malaysia.
Nitihka surat penerang Fadilah ke dipansut seiti berita portal kemari, Shazni ngarika parti ke berijista ba undang-undang lalu iya nadai mai ulah subversif.
Ku iya, tuju Shazni datai ke Sarawak ketegal ti deka betemu enggau kaban parti lalu ngulu pengawa parti ditu.
“Perintah Sarawak nguna kuasa ba Akta imigresen tauka undang-undang bukai ba orang ke enda mai ulah subversif sereta enda ngeruga pengelantang rayat Sarawak, tu pekara ke enda patut,” ku Fadilah nitihka ripot berita portal nya.
Ngenang sentang Program Korban kemari, penyampau 603 iku orang ke gawa ba JKM nerima dagin chapi nyerumba Hari Raya Korban ke dintu Hari Tiga tu tadi.
Enam iku chapi disayat ungkup program nya ke alai dua iku pemeri ari Abang Johari lalu empat iku ari Komiti Surau.
Bela datai Speaker Kunsil Nengeri Datuk Amar Mohamad Asfia Awang Nassar, Sekretari Perintah Nengeri Tan Sri Mohamad Morshidi Abdul Ghani, Menteri Muda ba Opis Kepala Menteri Syarifah Hasidah enggau orang bukai.